हलिउडका दुई प्रमुख म्यागजिनले क्रिस्टोफर नोलन निर्देशित फिल्म ‘द ओडिसी’को समीक्षा प्रकाशित गरेका छन्। भेराइटीले फिल्मको प्राविधिक टिम, विशेष गरी ध्वनि र संगीतको विधालाई ‘मास्टरक्लास’ भनेको छ। भेराइटीका समीक्षकका अनुसार अस्कर विजेता संगीतकार लुडविग गोरान्सनको पार्श्व संगीतले फिल्मलाई एउटा छुट्टै जीवन दिएको छ। प्राचीन ग्रीक बाजाहरू र आधुनिक अर्केस्ट्राको फ्युजनले जब एकआँखे दैत्य (साइक्लोप्स) को दृश्यमा प्रवेश गर्छ, हलभित्रको वातावरण स्तब्ध बनाउँछ।
भेराइटीले ओडिसियसले आफ्ना मृत साथीहरू र आमाको आत्मालाई भेट्न पाताल लोकको यात्रा गरेको दृश्यलाई फिल्मको सर्वश्रेष्ठ अंश मानेको छ। मधुरो प्रकाश, छायाको उत्कृष्ट खेल र हन्टिंग साउन्ड इफेक्ट्सले त्यो दृश्य दर्शकको मानसपटलमा लामो समयसम्म ताजा रहने भेराइटीको दाबी छ।
द इन्डिपेन्डेन्टले भने फिल्मको पटकथामा कमी देखेको छ। पटकथा लेखकसमेत रहेका नोलनले संवादभन्दा दृश्यलाई प्राथमिकता दिएको समीक्षामा उल्लेख छ। ‘होमरको कवितात्मक भाषा फिल्मका लामा र व्याख्यात्मक संवादहरूमा कतै हराएजस्तो लाग्छ। दृश्यका हिसाबले ५ स्टार पाउन योग्य फिल्म, पटकथाका हिसाबले ३ स्टारमा खुम्चिन्छ’ समग्रमा ३.५ स्टार दिँदै द इन्डिपेन्डेन्टले लेखेको छ।