भेनिस फिल्म फेस्टिभलको ८३ औं संस्करण सन् २०२६ मा आयोजना गरियो। सोही महोत्सवको उद्घाटनमा फिल्म ‘इंक’ सार्वजनिक गरियो। फिल्म रुपर्ट मर्डोक र सम्पादक ल्यारी ल्याम्बले सन् १९६९ मा ‘द सन’ पत्रिकाको थालनी गरेको कथाबाट अघि बढ्छ। यसको अन्त्य अमेरिकी राष्ट्रपति डोनल्ड ट्रम्प र धनाढ्य इलन मस्कसम्बन्धी दृश्यहरू समेटिएको मोन्टाजमा हुन्छ। फिल्मले वर्तमान विकृत राजनीतिक र मिडिया युगमा समाज कसरी आइपुग्यो भन्ने प्रश्न उठाउने प्रयास गरेको छ।
फिल्ममा ज्याक ओ’कोनेलले ल्यारी ल्याम्बको भूमिका निर्वाह गरेका छन् भने गाई पियर्स रुपर्ट मर्डोकको भूमिकामा छन्। ‘डेली मिरर’जस्तो प्रतिष्ठित तर परम्परागत मानिने पत्रिकामा रहेका ल्याम्बलाई पदोन्नति नहुँदा निराशा छ। उनको लेखन शैली भने आक्रामक छ। यही अवस्थामा उनको भेट उदीयमान मिडिया टाइकुन रुपर्ट मर्डोकसँग हुन्छ। समाचार कस्तो हुनुपर्छ भन्ने विषयमा दुवैबीच चर्को बहस चल्छ।
पत्रिका कार्यालय रहेको ‘फ्लिट स्ट्रिट’मा रातको समयमा पुगेपछि दुवै पात्र जमिनमा हात राख्छन्। त्यहाँ रहेको भूमिगत छापाखानाको आवाज र कम्पन उनीहरू महसुस गर्छन्। यो दृश्यले उनीहरूका लागि पत्रिका र समाचार रगतमा बगेको जस्तो आभास दिन्छ। मुटुको धड्कन र छापाखानाको मेसिनको आवाजबीच उनीहरू भिन्नता देख्दैनन्।
यो कथा सन् १९६९ को भए पनि निर्देशक बोयलले पृष्ठभूमिमा २०२५ को ‘स्प्रिन्ट्स’ ब्यान्डको पंक गीत ‘समथिंग्स गोन ह्यापन’ प्रयोग गरेका छन्। यो सांगीतिक संयोजनले भविष्यको बेलायती पत्रकारिता कुन बाटोतिर जानेछ भन्ने संकेत गरेको देखिन्छ। फिल्मको समग्र कथाले राजनीति र मिडिया एकअर्कासँग गाँसिँदै जाँदा पत्रकारितामा देखिने विकृति नै केन्द्रमा राखेको बुझिन्छ।
