लस एन्जलस। पप सम्राट माइकल ज्याक्सनको जीवनमा आधारित चलचित्र 'माइकल' ले विश्वव्यापी बक्स अफिसमा १ अर्ब अमेरिकी डलरभन्दा बढीको आँकडा पार गर्दै ऐतिहासिक सफलता हात पारेको छ। यो उपलब्धि हासिल गर्ने 'माइकल' विश्वकै पहिलो बायोपिक फिल्म बनेको छ।
फिल्मले अन्तर्राष्ट्रिय बजारबाट ६२ करोड ९८ लाख अमेरिकी डलर र उत्तर अमेरिकी बजारबाट ३७ करोड १८ लाख अमेरिकी डलर कमाएको छ। यससँगै फिल्मको कुल विश्वव्यापी आम्दानी १ अर्ब १० लाख अमेरिकी डलर पुगेको छ। अप्रिलमा प्रदर्शनमा आएदेखि नै 'माइकल' ले मिश्रित समीक्षाहरू र पर्दापछिका केही विवादका बाबजुद पनि दर्शकहरूबाट उत्कृष्ट प्रतिक्रिया प्राप्त गर्दै आएको छ।
यसले प्रदर्शनको पहिलो सप्ताहन्तमै उत्तर अमेरिकी बजारमा ९ करोड ७० लाख अमेरिकी डलर र विश्वभर २१ करोड ७० लाख अमेरिकी डलरको व्यापार गरेको थियो। यसले सन् २०१५ मा रिलिज भएको 'स्ट्रेट आउट्टा कम्पटन' ले बनाएको म्युजिकल बायोपिकको ओपनिङ सप्ताहन्तको ६ करोड अमेरिकी डलरको रेकर्ड तोडेको थियो।
कीर्तिमानी आम्दानी
'माइकल' ले सन् २०१८ को 'बोहेमियन र्याप्सोडी' को ९१ करोड १० लाख अमेरिकी डलरको विश्वव्यापी आम्दानीलाई पनि पछि पार्दै सर्वाधिक कमाइ गर्ने म्युजिकल बायोपिक बनेको छ। साथै, सन् २०२३ मा रिलिज भएको 'ओपेनहाइमर' को ९७ करोड ५० लाख अमेरिकी डलरको आम्दानीलाई उछिनेर वास्तविक व्यक्तिको जीवनमा आधारित सर्वाधिक कमाइ गर्ने फिल्मको कीर्तिमान पनि स्थापित गरेको छ।
यो सफलता लायन्सगेट स्टुडियोका लागि पनि विशेष रहेको छ। 'माइकल' लायन्सगेटको इतिहासमा १ अर्ब डलरको आँकडा पार गर्ने पहिलो फिल्म बनेको छ। यसअघि स्टुडियोका सर्वाधिक कमाइ गर्ने फिल्महरूमा सन् २०१३ को 'द हंगर गेम्सः क्याचिङ फायर' (८६ करोड ५० लाख डलर) र सन् २०१२ को 'द ट्वाइलाइट सागाः ब्रेकिंग डन – पार्ट २' (८५ करोड डलर) रहेका थिए। लायन्सगेटले फिल्मको निर्माण गरी उत्तर अमेरिकामा प्रदर्शन गरेको थियो भने अन्तर्राष्ट्रिय वितरण युनिभर्सलले गरेको थियो।
निर्देशक र स्टुडियोको भनाइ
लायन्सगेट मोसन पिक्चर ग्रुपका अध्यक्ष एडम फोगेलसनले दर्शकले फिल्मलाई आत्मीय रूपमा स्वीकार गरेको र यसले विश्वभरका सिनेमा हलमा एक विशिष्ट सांस्कृतिक घटनाका रूपमा स्थापित गरेको बताए। निर्देशक एन्टोइन फुक्वाले पनि यो उपलब्धि निर्माता, कलाकार, प्राविधिक टोली र साझेदारको अथक समर्पणको परिणाम भएको उल्लेख गर्दै दर्शकप्रति आभार व्यक्त गरे।
फिल्मको कथावस्तु र कलाकार
एन्टोइन फुक्वाद्वारा निर्देशित यस फिल्मले ज्याक्सन ५ बाट सुरु भएको माइकल ज्याक्सनको यात्रा र उनी 'किङ अफ पप' बनेसम्मको कथा प्रस्तुत गर्दछ। माइकलको भूमिकामा उनका वास्तविक भतिजा जाफर ज्याक्सनले अभिनयमा डेब्यु गरेका छन्। कोलम्यान डोमिङ्गो र निया लङले क्रमशः उनका आमाबुवा जो र क्याथरिन ज्याक्सनको भूमिका निर्वाह गरेका छन्। लायन्सगेटले ज्याक्सनको जीवनमा आधारित कम्तीमा थप एक फिल्म निर्माण गर्ने अपेक्षा गरिएको छ।
सन् २०२६ मा हालसम्म १ अर्ब डलरभन्दा बढी कमाइ गर्ने अर्को एक मात्र फिल्म युनिभर्सलको एनिमेटेड 'द सुपर मारियो ग्यालेक्सी मुभी' हो, जसले १ अर्ब ८० लाख अमेरिकी डलर कमाएको छ। डिज्नीको 'टोय स्टोरी ५' ले हालसम्म ८७ करोड ९१ लाख अमेरिकी डलर कमाइसकेको छ र चाँडै नै यो वर्षको तेस्रो १ अर्ब डलर क्लबमा प्रवेश गर्ने अपेक्षा गरिएको छ।