हलिउडका चर्चित निर्देशक क्रिस्टोफर नोलनले आफ्नो नयाँ र महत्त्वाकांक्षी परियोजनाका रूपमा तीन हजार वर्ष पुरानो ग्रीक महाकाव्य 'दी ओडिसी' लाई सिनेमाको पर्दामा उतार्ने भएका छन्। विश्वभरका सिनेमा हलहरूमा प्रदर्शनको तयारीमा रहेको यो चलचित्र नोलनको १३औं फिचर चलचित्र हो। यसअघि व्यावसायिक र समीक्षात्मक रूपमा निकै सफल सावित भएको 'ओपेनहाइमर' पछि उनी यस ऐतिहासिक कथाको निर्देशनमा जुटेका हुन्। युनिभर्सल पिक्चर्स र नोलनकै कम्पनी सिन्कोपीको ब्यानरमा यो चलचित्र निर्माण भएको छ।
मानवीय संघर्ष र घर फर्किने यात्रा
होमरको प्रसिद्ध महाकाव्य 'इलियड' को निरन्तरताका रूपमा रहेको 'ओडिसी' को कथा ट्रोजन युद्ध सकिएपछि सुरु हुन्छ। ग्रीक सेनाले विजय हासिल गरेपछि इथाकाका राजा ओडिसियस आफ्नो घर फर्कन चाहन्छन्। तर, उनको यो यात्रा सहज हुँदैन। पत्नी पेनेलोप र छोरा टेलिमाकसलाई भेट्न हिँडेका ओडिसियसले बाटोमा अनेकौं प्राकृतिक विपत्ति, देवताहरूको रिस र काल्पनिक जीवहरूको सामना गर्नुपर्छ।
साहित्यिक समालोचकहरूका अनुसार ओडिसियसले सामना गर्ने चुनौतीहरू वास्तवमा मानिसको भित्री संघर्षका प्रतीक हुन्। यस यात्रामा आउने विशाल साइक्लोप्सले शक्ति, साइरनले प्रलोभन र क्यालिप्सोले आरामको मोहलाई दर्शाउँछन्। नोलनले यसअघि 'मेमेन्टो', 'इन्सेप्सन' र 'इन्टरस्टेलर' जस्ता चलचित्रमार्फत मानिसको भित्री मनोविज्ञान र अस्तित्वको खोजीलाई प्रस्तुत गरिसकेका छन्। 'ओडिसी' मा पनि उनले बाहिरी युद्धभन्दा बढी मानिसको भित्री संघर्ष र पहिचानको खोजीलाई नै केन्द्रमा राखेको देखिन्छ।
महँगो बजेट र आईम्याक्स प्रविधिको प्रयोग
यो चलचित्र नोलनको करियरकै सबैभन्दा खर्चिलो परियोजना बनेको छ, जसको अनुमानित बजेट २५ करोड अमेरिकी डलर रहेको बताइएको छ। प्राविधिक दृष्टिकोणबाट यो चलचित्र इतिहासमै पहिलोपटक पूर्ण रूपमा 'आईम्याक्स ७० एमएम' फिल्म क्यामेरा प्रयोग गरेर खिचिएको फिचर चलचित्र हो। डिजिटल प्रविधिभन्दा वास्तविक अनुभवलाई प्राथमिकता दिने नोलनले यस चलचित्रका लागि ग्रीस, मोरक्को, इटाली, आइसल्यान्ड र स्कटल्यान्डका वास्तविक स्थानहरूमा छायाङ्कन गरेका छन्।
नेपालमा आईम्याक्स थिएटर नभएका कारण नेपाली दर्शकले यस प्रविधिको पूर्ण स्वाद लिन नपाए पनि चलचित्रको प्रि-बुकिङ भने खुलिसकेको छ। नोलनले यसअघि 'द डार्क नाइट' र 'इन्टरस्टेलर' मा पनि आईम्याक्सको प्रयोग गरेका थिए, तर यसपटक उनले यसलाई अझ बृहत् रूपमा प्रस्तुत गरेका छन्।
कलाकार टोली र कास्टिङ विवाद
चलचित्रमा मुख्य पात्र ओडिसियसको भूमिकामा म्याट डेमन प्रस्तुत भएका छन् भने उनकी पत्नी पेनेलोपको भूमिकामा एन ह्याथवे र छोरा टेलिमाकसको भूमिकामा टम हल्यान्ड रहेका छन्। यसका साथै रोबर्ट प्याटिन्सन, जेन्डाया, लुपिता न्योङओ र चार्लिज थेरोन जस्ता स्थापित कलाकारहरूको पनि यसमा अभिनय रहेको छ।
यद्यपि, चलचित्र प्रदर्शनमा आउनुअघि नै यसको कास्टिङलाई लिएर केही विवाद सिर्जना भएको छ। विशेषगरी लुपिता न्योङओलाई 'हेलेन अफ ट्रोय' को भूमिकामा चयन गरिएको विषयमा केही प्रशंसकहरूले प्राचीन ग्रीक पात्रहरूको ऐतिहासिक सत्यतामाथि प्रश्न उठाएका छन्। यस आलोचनाको जवाफ दिँदै निर्देशक नोलनले यस्ता प्रतिक्रियाहरू सामान्य भएको बताएका छन्। उनले विगतमा 'द डार्क नाइट' मा हेथ लेजरलाई जोकरको भूमिका दिँदा पनि यस्तै आलोचना भएको तर पछि उनको अभिनय सर्वत्र रुचाइएको स्मरण गराएका छन्।
