खोटाङ — पूर्वाधार विकास कार्यालय खोटाङबाट चालु आर्थिक वर्षमा सञ्चालन गरिएका एक सय २५ योजनामध्ये करिब दर्जन योजनाहरू अपूरै रहेका छन्। निर्माण कम्पनीहरूले सम्झौता गरेर पनि समयमा काम नथाल्नु र सरासर निर्माण कार्य नगर्नुले गर्दा ती योजनाहरूले पूर्णता पाउन सकेका छैनन्।
कार्यालयका अनुसार पाँच ठूला योजनामध्ये हुर्लुङ–जालपा–सप्तेश्वर–बाक्सिला सडक, नुनथला–जौबारी–कुभिण्डे–हरमटार–ऐसेलुखर्क सडक, बङ्सिला–चिसापानी–मौवाबोटे सडक, अस्पतालचौक–साकेला सडक र दिखुवाखोला पुलको काम अधूरा अवस्थामा छन्।
भौतिक प्रगति न्यून
पूर्वाधार विकास कार्यालय खोटाङका सूचना अधिकारी रजत पोखरेलले हुर्लुङ–जालपा–सप्तेश्वर–बाक्सिला सडकको अस्फाल्ट कालोपत्रको भौतिक प्रगति करिब २५ प्रतिशत र वित्तीय प्रगति २१ दशमलव ६९ प्रतिशत मात्र भएको जानकारी दिए। त्यस्तै, नुनथला–जौबारी–कुभिण्डे–हरमटार–ऐसेलुखर्क सडकको अस्फाल्ट कालोपत्रको भौतिक प्रगति ४० प्रतिशत र वित्तीय प्रगति ४१ दशमलव ५० प्रतिशत रहेको छ।
यी दुवै सडकको ठेक्का बीसी–पीसी–पीकेबी जेभीले लिएको हो। हुर्लुङ–जालपा–सप्तेश्वर–बाक्सिला सडकको लागत दुई करोड ५३ लाख ५३ हजार ५ सय १५ रुपैयाँ रहेको छ। उक्त निर्माण कम्पनीले गत वैशाख ३ गते कार्यालयसँग सम्झौता गरेको थियो भने गत असार १५ गतेभित्र काम सक्ने समयसीमा तोकिएको थियो। तर, समयसीमा गुज्रिसक्दा पनि काम अधूरै छ।