प्रधानमन्त्रीको दैवी प्रकोप राहत कोषमा रु १ लाख २० हजार दान गरेको भन्दै नक्कली बैंक विवरण तयार पारी सामाजिक सञ्जालमा फैलाएको आरोपमा रामेछाप प्रहरीले एक व्यक्तिलाई पक्राउ गरेको छ।
रामेछापको गोकुलगंगा गाउँपालिका–२ थोसेका ३२ वर्षीय भगवान कार्कीलाई शुक्रबार नियन्त्रणमा लिइएको जिल्ला प्रहरी कार्यालय रामेछापले जनाएको छ। रासुवा बाढीबाट प्रभावितको उद्धार र राहतका लागि आफूले प्रधानमन्त्री राहत कोषमा रु १ लाख २० हजार दान गरेको देखाउने नक्कली बैंक स्टेटमेन्ट उनले तयार पारेको प्रहरीको भनाइ छ।
प्रारम्भिक अनुसन्धानका अनुसार कार्कीले उक्त नक्कली दस्तावेज बनाउन च्याटजीपीटीको प्रयोग गरेका थिए। आफ्नै क्यूआर कोड थपेर उनले सामाजिक सञ्जालमा उक्त विवरण सार्वजनिक गरेको पाइएको छ। सूचना प्राप्त भएपछि प्रहरी टोलीले उनलाई पक्राउ गरेको हो।
कार्कीको क्रियाकलापले प्रधानमन्त्री राहत कोषकै नाममा गलत सूचना र भ्रम फैलाउने तथा वित्तीय ठगीमा सहयोग पुर्याउने सम्भावना रहेको प्रहरीको आशंका छ। थप अनुसन्धान भइरहेको प्रहरी सूचना अधिकारी कमल राउतले जानकारी दिए।
