अन्नपूर्ण संरक्षण क्षेत्रमा असोज महिनामा ३२ हजार ९६३ विदेशी पर्यटक भित्रिएका छन्। अन्नपूर्ण संरक्षण क्षेत्र आयोजना (एकाप) को तथ्याङ्कअनुसार गत वर्षको सोही अवधिको तुलनामा यसपालि २ हजार ४१६ पर्यटक बढी आएका हुन्। गत वर्ष असोजमा यो क्षेत्रमा ३० हजार ५४७ विदेशी पर्यटक पुगेका थिए।
असोजमा आएका पर्यटकमध्ये १२ हजार ६४५ दक्षिण एसियाली मुलुकका नागरिक छन् भने बाँकी २० हजार ३१८ अन्य देशका पर्यटक रहेको एकापले जनाएको छ।
चालु आर्थिक वर्षको सर्वाधिक मासिक आगमन
चालु आर्थिक वर्षमा अहिलेसम्मकै सर्वाधिक पर्यटक असोजमै भित्रिएका हुन्। एकापको तथ्याङ्कमा साउनमा २६ हजार ५९१ र भदौमा १७ हजार ९१३ विदेशी पर्यटकको आगमन रहेको छ, जुन असोजको तुलनामा कम हो।
अनुकूल मौसम र ट्रेकिङ सिजन
असोज र कात्तिक नेपालको मुख्य ट्रेकिङ सिजन भएकाले यो अवधिमा पर्यटकको सङ्ख्या सामान्यतः बढ्ने गरेको एकापका प्रमुख डा रविन कडरियाले बताए। अहिलेको अनुकूल मौसम र पदयात्राका लागि राम्रो अवस्थाका कारण अन्नपूर्ण क्षेत्र अन्तर्राष्ट्रिय पर्यटकको रोजाइमा परेको उनको भनाइ छ।
अन्नपूर्ण सर्किटलगायतका पदमार्गबाट पर्यटकले अन्नपूर्ण आधार शिविर, मार्दी हिमाल, घान्द्रुक, तिलिचो ताल, थोरोङ ला भञ्ज्याङ, माथिल्लो मुस्ताङ र घोरेपानीजस्ता गन्तव्यमा पुग्न सक्छन्।
७ हजार ६०० वर्गकिलोमिटरभन्दा बढी क्षेत्रफलमा फैलिएको अन्नपूर्ण संरक्षण क्षेत्र हिमाली दृश्य, जैविक विविधता, सांस्कृतिक सम्पदा र विविध पदमार्गका लागि परिचित छ। पर्यटन पूर्वाधारमा भएको सुधार र स्थानीय आतिथ्यले पनि विश्वभरका पर्यटकलाई यहाँ तानिरहेको एकापले उल्लेख गरेको छ।
दसैँदेखि तिहारसम्मको अवधि क्षेत्रको प्राकृतिक सौन्दर्य र हिमाली संस्कृतिको अनुभव लिन चाहने पदयात्रीमाझ विशेष लोकप्रिय रहने गरेको डा कडरियाले जनाएका छन्।
