पोखरादेखि दुबईसम्म नियमित उडान सञ्चालन गरिरहेको वायुसेवा फ्लाइदुबईले सन् २०२७ अक्टोबर ३० तारिखसम्मका लागि टिकट बुकिङ खोलेको छ । पोखराको पहिलो नियमित अन्तर्राष्ट्रिय हवाई सम्पर्क रहेको यो मार्ग दीर्घकालीन बन्ने संकेतका रूपमा पर्यटन व्यवसायीहरूले यसलाई लिएका छन् ।
पोखरा अन्तर्राष्ट्रिय विमानस्थलबाट अन्तर्राष्ट्रिय उडान सुरु भएको केही सातामै बुकिङ अवधि लामो बनाइएको हो । यसले मार्गको दिगोपनबारे उठेका चासो कम गरेको तथा बढी अन्तर्राष्ट्रिय पर्यटक र लगानी भित्र्याउने आशा बलियो बनाएको व्यवसायीहरूको भनाइ छ ।
यात्रु आवागमन
हालसम्म दुबईबाट पोखरा आउने यात्रुको संख्या ३ हजार १ सयभन्दा माथि पुगेको छ भने पोखराबाट दुबईतर्फ जाने यात्रु १ हजार ४ सय २३ रहेका छन् । दसैँ सकिएपछि बाहिर जाने यात्रुको संख्या बढ्ने र मार्गले क्रमशः गति लिने व्यवसायीहरूको अपेक्षा छ ।
विमानस्थल अधिकारीहरूका अनुसार मौसमका कारण एक उडान रद्द भए पनि सेवा सुरु भएयताका अन्य उडान नियमित रूपमा सञ्चालन भइरहेका छन् । फ्लाइदुबईले बोइङ ७३७ म्याक्स ८ विमान प्रयोग गरी दैनिक उडान गरिरहेको छ, जसले पोखरालाई दुबईको विस्तृत अन्तर्राष्ट्रिय नेटवर्कसँग जोडेको छ ।
सन् २०२३ मा अन्तर्राष्ट्रिय विमानस्थल सञ्चालनमा आए पनि नियमित विदेशी वायुसेवा भित्र्याउन संघर्ष गरिरहेको पोखराका लागि फ्लाइदुबईको आगमनलाई उपलब्धिका रूपमा हेरिएको छ । मार्गलाई दीर्घकालसम्म सफल बनाउन वायुसेवा, सरकारी निकाय र स्थानीय व्यवसायबीच निरन्तर सहकार्य आवश्यक रहेको पर्यटन सरोकारवालाहरू बताउँछन् ।
