विश्वकप विजेतालाई फिफाद्वारा विशेष औंठी, फाइनलमा ट्रम्प र स्पेनी राजपरिवार

फिफाले सन् २०२६ को विश्वकपको विजेता टोलीका खेलाडीहरूका लागि विशेष औंठी तयार पारेको छ । यो औंठीको डिजाइन विश्वकप ट्रफीको प्रतिकृति रहेको छ र यसमा गहिरो लेखाइ समावेश गरिएको छ । विजेता टोलीका ३० खेलाडीले यो औंठी प्राप्त गर्नेछन् । साथै, फिफाले १ हजार ९ सय ९६ वटा औंठी बजारमा बिक्रीका लागि राख्ने जनाएको छ । अमेरिकी खेलकुद संस्कृतिमा विजेतालाई औंठी दिने परम्परा रहँदै आएको छ, जसलाई फिफाले यस विश्वकपबाट लागू गरेको हो ।

फाइनलमा उच्चस्तरीय उपस्थिति

फाइनल खेलको प्रमुख अतिथि अमेरिकी राष्ट्रपति डोनाल्ड ट्रम्प हुनेछन् । बीबीसीका अनुसार उनैले विजेतालाई ट्रफी प्रदान गर्नेछन् । ट्रम्प यस विश्वकपका १ सय २ खेलमा उपस्थित नभए पनि फाइनलमा सहभागी हुन लागेका हुन् । स्पेनका प्रधानमन्त्री पेड्रो सान्चेज पनि फाइनल हेर्न अमेरिका जाने उनको कार्यालयले जनाएको छ । सान्चेज ट्रम्पका प्रखर आलोचक मानिन्छन् । उनी फाइनल हेरेपछि आधिकारिक भ्रमणका लागि अल्जेरिया जाने कार्यक्रम रहेको छ ।

स्पेनका राजा फिलिप छैटौं र रानी लेटेजिया आफ्ना दुई छोरीसहित फाइनलमा सहभागी हुने रोयल प्यालेसले जानकारी दिएको छ । यता, अर्जेन्टिनाका राष्ट्रपति जेभियर मिलेइले भने अन्धविश्वासका कारण फाइनल हेर्न जाने योजना रद्द गरेको बताइएको छ ।

न्युयोर्कको वायु प्रदूषण

फाइनल हुनु दुई दिनअघि न्युयोर्कको मौसम प्रदूषित बनेको छ । क्यानडाको जंगलमा लागेको डढेलोले गर्दा न्युयोर्कको वातावरणमा असर परेको हो । तर यसले मेटलाइफ रंगशालामा हुने फाइनल खेलमा कुनै प्रतिकूल असर नपार्ने अधिकारीहरूले जनाएका छन् ।