सिरहाको लहान नगरपालिका-३ स्थित नयाँ बस्ती टोलमा प्रहरीले ठूलो परिमाणको लागुऔषध बरामद गरेको छ। पार्किङमा रहेको बा२१च ५६६६ नम्बरको योद्धा पिकअप गाडीमा खानतलासी गर्दा नास्पातीका क्रेटभित्र लुकाएर राखिएको गाँजा फेला परेको जिल्ला प्रहरी कार्यालय सिरहाले जनाएको छ।
प्रहरीका अनुसार विशेष सूचनाका आधारमा गरिएको कारबाहीमा उक्त पिकअप गाडीसहित तीन जनालाई नियन्त्रणमा लिइएको छ। गाडीभित्र नास्पातीका ४६ वटा क्रेट रहेको र ती क्रेटभित्र बोरामा लुकाइएको गाँजा जस्तो देखिने पदार्थ बरामद भएको हो।
बरामद परिमाण
प्रहरीले बरामद गरेको गाँजाको तौल प्लास्टिकसहित ६६३ किलो र प्लास्टिक हटाउँदा ६५२ किलो रहेको छ। साथै, करिब ९ हजार ९ सय २० किलो नास्पाती समेत नियन्त्रणमा लिइएको छ।
पक्राउ परेका व्यक्ति
घटनामा संलग्न रहेको आरोपमा लहान नगरपालिका-३ का ३८ वर्षीय श्यामकुमारी साह, भारतको बिहार राज्य मधुवनी जिल्ला घर भई हाल लहान-३ बस्दै आएका ४० वर्षीय गौरव महतो तथा उनका १९ वर्षीय छोरा शिवम साहलाई प्रहरीले नियन्त्रणमा लिएको छ।
अनुसन्धान जारी
जिल्ला प्रहरी कार्यालय सिरहाका प्रवक्ता एवं प्रहरी नायब उपरीक्षक (डीएसपी) रमेशबहादुर पालका अनुसार विशेष सूचनाका आधारमा गरिएको अपरेशनमा ठूलो परिमाणमा लागुऔषध बरामद भएको हो। पक्राउ परेका तीनै जनामाथि लागुऔषधसम्बन्धी कसुरमा अनुसन्धान भइरहेको तथा गाँजाको स्रोत, गन्तव्य र यसमा संलग्न अन्य व्यक्तिको पहिचानका लागि अनुसन्धानलाई थप विस्तार गरिएको उनले जानकारी दिए।
प्रहरीले बरामद भएको पिकअप, गाँजा जस्तो देखिने पदार्थ र अन्य सामग्री नियन्त्रणमा लिएर कानुनी प्रक्रिया अघि बढाएको जनाएको छ।