काठमाडौं, २९ साउन । नेपाली कांग्रेसका उपसभापति विश्वप्रकाश शर्माले पार्टीभित्र युवा नेतृत्वलाई विधि र पद्धतिअनुसार आत्मसात गर्नुपर्ने बताएका छन्। शुक्रबार सानेपास्थित पार्टी केन्द्रीय कार्यालयमा बसेको केन्द्रीय कार्यसम्पादन समितिको बैठकमा बोल्दै उनले परिवर्तन र युवा सहभागितालाई स्थापित प्रक्रियाबाट अगाडि बढाउनुपर्नेमा जोड दिए।
यसै क्रममा उनले पूर्वसभापति शेरबहादुर देउवाको स्वदेश फिर्तीलाई स्वागत गरे। देउवाबाट सबै पक्षलाई समेट्ने र एकताको सन्देश प्रवाह हुने उनले अपेक्षा व्यक्त गरे।
विधि र पद्धतिअनुसार युवा नेतृत्व
बैठकमा बोल्दै उपसभापति शर्माले नेपाली कांग्रेस अहिले विधि र प्रक्रियामार्फत परिवर्तनको अध्यायमा रहेको उल्लेख गरे। उनले भने, ‘युवालाई अगाडि बढाउने विषयमा हामीले ३६ वर्षको युवक देशको प्रधानमन्त्री भएको इतिहासलाई आत्मसात गरेका छौँ भने ५० वर्ष हाराहारीको युवाले पार्टीको नेतृत्व गर्ने कुरालाई पनि सहज रूपमा स्वीकार्नुपर्छ।’
विधि र पद्धतिबाट आएको युवा नेतृत्वलाई स्वीकार गर्न नसक्नुले पार्टीभित्र गम्भीर प्रश्न उब्जाउने उनको तर्क छ।
देउवाको स्वदेश फिर्ती र एकताको सन्देश
पूर्वसभापति देउवाले आफ्नो लिखित अभिव्यक्तिमा परिवर्तनलाई आत्मसात गर्ने र युवालाई अगाडि बढाउने प्रतिबद्धता जनाएको सन्दर्भ उल्लेख गर्दै शर्माले सो विचारलाई अहिलेको सम्मेलनको केन्द्रमा राखिनुपर्ने बताए। देउवाको स्वदेश फिर्तीपछि पार्टीमा एकता र सहकार्य बढ्ने विश्वाससमेत उनले व्यक्त गरे।
