रसुवाको भोटेकोशी क्षेत्रमा आएको बाढीको प्रभाव त्रिशूली नदीसम्म पुगेको छ। धादिङको गल्छीस्थित बाढीमापन केन्द्रमा आइतबार बिहान त्रिशूली नदीको जलसतह तीन मिटरले बढेको बाढी पूर्वानुमान महाशाखाले जनाएको छ।
गण्डकी प्रदेशका विभिन्न जलाधार क्षेत्रमा भारी वर्षा मापन भइरहेकाले नारायणी नदी र यसका सहायक नदीमा पनि पानीको सतह बढ्न सक्ने महाशाखाको भनाइ छ। नदी तटीय क्षेत्रमा बसोबास गर्ने स्थानीयलाई सतर्क रहन आग्रह गरिएको छ।
यसैबीच, सिन्धुलीको खुर्कोटमा रहेको जलमापन केन्द्रमा सुनकोशी नदीको जलसतह सतर्कता तहभन्दा माथि पुगेको छ। महाशाखाले आइतबार बिहान ७:०२ बजे जारी गरेको सूचनामा सुनकोशी तटीय क्षेत्रका बासिन्दालाई विशेष सावधानी अपनाउन भनिएको छ।
पछिल्लो अवस्थालाई ध्यान दिँदै त्रिशूली, नारायणी र सुनकोशी नदी आसपास बस्ने नागरिकलाई नदीको बहाव बढ्न सक्ने भएकाले सतर्क रहन महाशाखाले आग्रह गरेको छ।
