विजया दशमीका अवसरमा राष्ट्रपति रामचन्द्र पौडेलले गुरु पुरोहितबाट टीका, जमरा र आशीर्वाद ग्रहण गर्ने भएका छन्। शीतल निवासस्थित राष्ट्रपति कार्यालयमा बिहान १०ः२६ बजेको शुभसाइतमा उनले उक्त संस्कार ग्रहण गर्ने कार्यक्रम रहेको राष्ट्रपतिका प्रेस सल्लाहकार किरण पोखरेलले जानकारी दिएका छन्।
दसैँको मुख्य दिन मानिने विजया दशमीमा राष्ट्रपतिले परम्पराअनुसार गुरु पुरोहितमार्फत टीका र जमरा लगाउने गरेका छन्। यस वर्ष पनि सोही परम्परा कायम राखिएको छ र तोकिएको साइतमै संस्कार सम्पन्न गर्ने तयारी भएको प्रेस सल्लाहकार पोखरेलले बताए।
यसअघिका वर्षहरूमा राष्ट्रपतिले शीतल निवासमा सर्वसाधारणलाई टीका लगाइदिने गरेका थिए। तर गत वर्षदेखि मुलुकले विषम परिस्थिति सामना गर्नुपरेको र शान्त तथा हर्षोल्लासपूर्ण वातावरण नरहेकाले सो कार्यक्रम गरिएको छैन। यो वर्ष पनि सर्वसाधारणका लागि खुला टीका कार्यक्रम नराखिएको उनले जनाएका छन्।
