रसुवाको भोटेकोशी क्षेत्रबाट आएको बाढीका कारण त्रिशूली नदीको जलसतहमा उल्लेख्य वृद्धि भएको छ। बाढी पूर्वानुमान महाशाखाले आइतबार बिहान ७ बजे धादिङको गल्छीस्थित बाढी मापन केन्द्रमा गरिएको नापमा त्रिशूलीको पानीको सतह करिब तीन मिटरले बढेको जनाएको छ।
गण्डकी प्रदेशका विभिन्न जलाधार क्षेत्रमा भारी वर्षा मापन भएकाले नारायणी नदी तथा यसका सहायक नदीहरूमा समेत जलसतह बढ्न सक्ने महाशाखाको आकलन छ। बढ्दो जोखिमलाई मध्यनजर गर्दै महाशाखाले नारायणी र यसका सहायक नदीको तटीय क्षेत्रमा बसोबास गर्ने सर्वसाधारण तथा नदी किनार आसपासका बासिन्दालाई सतर्कता अपनाउन अनुरोध गरेको छ।
