काठमाडौँ — नेपाली कांग्रेसको १५औँ राष्ट्रिय महाधिवेशन प्रक्रियाअन्तर्गत खुला कोटाको सहमहामन्त्री पदमा रामहरि खतिवडा र अजयबाबु सिवाकोटी निर्वाचित भएका छन्।
पार्टीको केन्द्रीय निर्वाचन समितिले भने बेलुका ९ बजेसम्मको मतगणनाको अन्तिम परिणाम औपचारिक रूपमा घोषणा गरेको छैन। निर्वाचित भएको जानकारी दिएका खतिवडाका अनुसार उनले २,९१९ मत प्राप्त गरे। सिवाकोटीले २,१७२ मत पाएका छन्।
खुला कोटामा नौ प्रतिस्पर्धी
सहमहामन्त्रीको खुला कोटामा नौ जना उम्मेदवार प्रतिस्पर्धामा थिए। गण्डकी प्रदेशसभा सदस्य दिल्लीराम सुवेदीले १,८५१ मत ल्याए। पूर्व गृहराज्यमन्त्री देवेन्द्रराज कणेलले १,३८२ मत पाए।
त्यसैगरी राजीव ढुंगानाले १,२४१ र विकास कोइरालाले १,१४९ मत प्राप्त गरे। अमृतकुमार अर्यालले १,०३९, रमेश धमलाले ८२१ र बिमल क्षेत्रीले २८२ मत पाए।
पिछडिएको क्षेत्रतर्फ शाही विजयी
पिछडिएको क्षेत्रतर्फको सहमहामन्त्री पदमा जीवनबहादुर शाही निर्वाचित भएका छन्। उनले ३,९०६ मत हात पारे।
यही पदका लागि जनकराज गिरी, नारायणप्रसाद भट्टराई, राजन कुँवर र रामबहादुर बिष्ट पनि चुनावी मैदानमा थिए। गिरीले १,३७०, भट्टराईले ७२१, कुँवरले ३२४ र बिष्टले २६० मत पाए।
केन्द्रीय निर्वाचन समितिले अन्तिम परिणाम घोषणा गरेपछि मात्रै निर्वाचित पदाधिकारीको आधिकारिक टुंगो लाग्नेछ।
