ललितपुरको सानेपामा इटालियन शैलीको जेलाटो ब्रान्ड 'नट्स एन्ड स्कुप' सञ्चालनमा आएको छ। आइतबार उद्घाटन भएको दिन २०० भन्दा बढी ग्राहकले सेवा लिएको कम्पनीले जनाएको छ।
मोनिका टापरिया र बिपिन अतलले सुरु गरेको यस उद्यममा २० भन्दा बढी स्वाद राखिएका छन्। जेलाटो बनाउन प्रयोग हुने विशेष उपकरण, उच्चस्तरीय सामग्री तथा प्रविधि अपनाइएको र त्यसका लागि इटालीको जेलाटो युनिभर्सिटीमा तालिम लिइएको कम्पनीले जानकारी दिएको छ।
नेपाल–इटाली चेम्बर अफ कमर्स एन्ड इन्डस्ट्री (एनआईसीसी) का अध्यक्ष सञ्जय अग्रवाल अक्टोबर ११ मा भएको उद्घाटन कार्यक्रममा प्रमुख अतिथिका रूपमा सहभागी भएका थिए। उनले परम्परागत व्यापारभन्दा बाहिर गएर उद्यमशीलता, लगानी, पर्यटन र सांस्कृतिक आदानप्रदानमार्फत नेपाल–इटाली सहकार्य विस्तार गर्न सकिने सम्भावना औंल्याए।
अन्तर्राष्ट्रिय अनुभव र सीप नेपाल भित्र्याउने उद्यमले ज्ञानको आदानप्रदानमा टेवा पुग्ने तथा दुई देशबीच जनस्तरको सम्बन्ध सुदृढ हुने अग्रवालको भनाइ छ।
संस्थापकहरूका अनुसार नवीनता, ग्राहकको प्रतिक्रिया र इटालीमा थप व्यावसायिक तालिममार्फत उत्पादन परिमार्जन गर्ने योजना छ। स्थानीय बजारमा इटालियन शैलीको जेलाटो निर्माण भित्र्याउने यो सुरुवातसँगै ब्रान्डले सानेपालाई प्रिमियम डेजर्ट गन्तव्यका रूपमा स्थापित गर्ने लक्ष्य राखेको छ।
