चितवन — पृथ्वी राजमार्गअन्तर्गत इच्छाकामना–४ को घोप्टेभिरमा बिहान खसेको सुक्खा पहिरो पन्छाएपछि सडक दिउँसो २ः१५ बजेदेखि दुईतर्फी सञ्चालनमा आएको छ । पहिरोका कारण अवरुद्ध राजमार्ग यसअघि दिउँसो १२ बजेदेखि एकतर्फी रूपमा खुलाइएको थियो ।
जिल्ला प्रहरी कार्यालयका प्रमुख प्रहरी उपरीक्षक रामेश्वर पौडेलका अनुसार दुईतर्फी सञ्चालन सुरु भएसँगै बाटोमा रोकिएका सवारीसाधन आफ्ना गन्तव्यतर्फ लागेका छन् । एकतर्फी अवस्थामा सवारीलाई लाइनमा राखेर पालैपालो पठाइएको थियो ।
नौबिसे–मुग्लिन सडक आयोजना पश्चिम खण्डका सूचना अधिकारी इन्जिनियर सचिन्द्र मिश्रका अनुसार पहिरो झन्डै ३५ मिटर माथिबाट खसिरहेको थियो, जसले गर्दा सडक सफा गर्न हम्मेहम्मे परेको थियो । उक्त स्थानमा भित्तो काटिएको अवस्था भने छैन, माथिबाटै पहिरो खसेको हो ।
जोखिम कायमै
त्यो क्षेत्र कमजोर रहेकाले फेरि पनि पहिरो खस्न सक्ने सम्भावना टरेको छैन । मिश्रका अनुसार जुनसुकै बेला पहिरो जान सक्ने अवस्था विद्यमान छ, त्यसैले सो खण्डमा सतर्कता अपनाउनुपर्ने देखिन्छ ।
बिहान पहिरो खस्दा राजमार्ग पूर्ण रूपमा अवरुद्ध भएको थियो । सडक खुलाउने काम भइरहेको अवधिभर सवारीसाधनको चाप बढेको थियो, जुन अहिले हटेको छ ।
