१० भदौको बाढीले फुर्केखोला पुल बगाएर विच्छेद भएको धादिङ सदरमुकाम–पृथ्वी राजमार्ग सम्पर्कलाई तत्कालका लागि जोड्न जिल्लाका सबै १३ वटा स्थानीय तहको लागत साझेदारीमा फुर्केखोलामा पन्टुन ब्रिज जडान सुरु गरिएको छ । नीलकण्ठ नगरपालिकाका प्रमुख भीमप्रसाद ढुंगानाका अनुसार भाइटीकाको भोलिपल्टदेखि पुल जडानको काम थालिने छ ।
पन्टुन ब्रिज अस्थायी प्रबन्ध हो । पानीको बहाव कम हुने हिउँदयाममा मात्र यो सञ्चालन गर्न सकिन्छ । यातायात सुचारु गर्ने उद्देश्यले तत्कालका लागि यस्तो संरचना राख्न लागिएको प्रमुख ढुंगानाले जानकारी दिए ।
पुलका लागि आवश्यक ड्रम र अन्य संरचना बर्दिया राजापुरबाट धादिङ पुर्याइएको छ । राजापुरको पन्टुनमा ३३ वटा ड्रम रहेकोमा तीन ड्रम यसअघि नै बाढीले बगाएको थियो । धादिङमा २४ वटा ड्रम ल्याइएको प्रमुख ढुंगानाले बताए । प्राविधिकको जाँचपासमा सोही संख्याका ड्रम जोड्दा नदी वारपार गर्न सकिने देखिएपछि त्यति नै संख्यामा पुलका पार्टहरू ढुवानी गरिएको उनको भनाइ छ । एउटा कन्टेनरमा दुईवटा पार्टमात्र राख्न सकिने भएकाले सोहीअनुसार रकम भुक्तानी गरी संरचना धादिङ ल्याइएको उनले जनाए ।
अहिले पुलका पार्टहरूको मर्मत र रङरोगन तथा पुलसम्म पुग्ने पहुँचमार्ग निर्माणको काम भइरहेको छ । प्राविधिकको सल्लाहअनुसार पहिलो चरणमा हलुका सवारीसाधन र अत्यावश्यक सेवाका सवारी मात्र आवागमन गराइने, त्यसपछि मात्र भारी सवारीको परीक्षण गरिने प्रमुख ढुंगानाले बताए ।
सेवा नपाएर थन्किएको पन्टुन
यो पन्टुन कुनै समय बर्दिया राजापुर क्षेत्रको परिचय बनेको थियो । गेरुवा नदीमा यसले २०५६ देखि २०७० सालसम्म १४ वर्ष सेवा दिएको थियो । कात्तिकदेखि जेठसम्म नदीमाथि राखेर यसबाट यातायात सञ्चालन गरिन्थ्यो, जसकारण स्थानीयले यसलाई राजापुरको बरदान मान्थे । एसियाली विकास बैंकको करिब सात करोड ऋण सहयोगमा भित्र्याइएको यो चिनियाँ प्रविधिको पुल हो ।
लामो समय मर्मत नगरिएकाले कतिपय ड्रममा खिया लाग्ने र प्वाल पर्ने समस्या देखिएको थियो भने पन्टुन व्यवस्थापन राजापुर सिँचाइ आयोजनाका लागि समेत टाउके दुखाइ बनेको थियो । कर्णाली नदीमाथि कोठियाघाटमा पक्की पुल निर्माण हुनुअघि यसैले यातायात सुविधा दिएको थियो । असोज २०७१ मा सोही स्थानमा पक्की पुल उद्घाटन भएपछि पन्टुन थन्किएर जीर्ण अवस्थामा रहेको थियो । पन्टुन राजापुर सिँचाइ व्यवस्थापन कार्यालय मातहत थियो ।
प्रयोगविहीन पुलको क्षमता केही कम भए पनि प्रयोग गर्न योग्य रहेको प्राविधिकले जाँचपछि बताएकाले धादिङमा जडान गर्ने निर्णय गरिएको प्रमुख ढुंगानाले जानकारी दिए । स्थानीय तहले सिँचाइ विभाग र मन्त्रालयबाट समेत सिफारिस लिएर फुर्केखोलामा जडानको अन्तिम तयारी गरेको छ ।
स्थायी पुलका लागि दबाब
बाढीले फुर्केखोला पुल बगाएपछि धादिङ सदरमुकाम पृथ्वी राजमार्गसँग जोडिने मार्ग विच्छेद भएको छ । यसले धादिङ र गोरखाका केही गाउँको यातायात सेवामा अवरोध पुर्याएको छ । अस्थायी विकल्पबाट यातायात चलाइए पनि यात्रुले सास्ती खेप्नुपरेको, महँगी बढेको र स्थानीय उत्पादनले बजार नपाएको प्रमुख ढुंगानाले बताए ।
फुर्केखोलामा छिटो स्थायी पुल बनाउनुपर्ने आवश्यकता भए पनि निर्माणको काम नै सुरु नभएकाले स्थानीय सरकारहरू मिलेर अस्थायी जोहो गर्न लागेको उनको भनाइ छ । अस्थायी पन्टुन बनाउन मात्र ३०–३५ लाख रुपैयाँ लागत लाग्ने उनले जानकारी दिए । स्थायी पुल वा बेलिब्रिज स्थानीय तहको क्षमताले जडान गर्न नसकिने भएकाले संघीय सरकारले छिटो पहल गर्नुपर्ने उनले बताए । स्थानमा स्थायी पुल निर्माणका लागि निरन्तर दबाब कायम राखिने पनि उनले जनाए ।
