इरानमाथि अमेरिकी आक्रमणको केन्द्रविन्दु दक्षिणी पूर्वाधार, तेल मूल्य चुलियो

अमेरिकी आक्रमणले इरानको दक्षिणी भागमा रहेको पूर्वाधारलाई निशाना बनाएको विश्लेषण गरिएको छ। विश्लेषकहरूका अनुसार यो आक्रमण इरानलाई वार्तामा ल्याउनका लागि सिर्जना गरिएको अधिकतम दबाबको रणनीति हुन सक्छ। तर नागरिक पूर्वाधारमाथिको यस्तो आक्रमणले इरानी जनतामा अमेरिकाविरोधी भावना झन् तीव्र बनाउन सक्ने खतरा पनि औंल्याइएको छ।

तेलको मूल्यमा ठूलो उछाल

शुक्रबार अन्तर्राष्ट्रिय बजारमा कच्चा तेलको मूल्यमा ४ प्रतिशतभन्दा बढीको वृद्धि भएको छ। यो वृद्धि गत एक महिनायताकै उच्च हो। हर्मुज जलमार्गमा सिर्जित अवरोध र रेड सी बन्द हुनसक्ने हुथी विद्रोहीको चेतावनीले तेल ढुवानीमा गम्भीर संकट पैदा गरेको छ।

शुक्रबार ब्रेन्ट क्रुडको मूल्य प्रति ब्यारेल ३.८७ डलर (४.५९ प्रतिशत) बढेर ८८.१० डलर पुगेको छ। त्यसैगरी, अमेरिकी वेस्ट टेक्सास इन्टरमिडिएट (डब्लूटीआई) को मूल्य पनि ३.५४ डलर (४.४८ प्रतिशत) ले वृद्धि भएर प्रति ब्यारेल ८२.४९ डलर कायम भएको छ।