अमेरिकी राष्ट्रपति डोनाल्ड ट्रम्पले सन् २०२० को राष्ट्रपति निर्वाचनमा धाँधली भएको दाबी पुनः दोहोर्याएका छन्। यसपटक उनले चीनको षड्यन्त्रका कारण आफू पराजित भएको दाबी गरेका छन्। बिहीबार राति टेलिभिजनमा गरिएको विशेष सम्बोधनमा ट्रम्पले भर्खरै सार्वजनिक गरिएका गोप्य दस्ताबेजले विदेशी हस्तक्षेपको पुष्टि गरेको बताए।
ट्रम्पले चीनले वर्षौं लगाएर २२ करोड अमेरिकी मतदाताको व्यक्तिगत विवरण अवैध रूपमा संकलन गरेको आरोप लगाए। उनका अनुसार चीनले २०१८ को मध्यवधि र २०२० को राष्ट्रपति निर्वाचनमा रिपब्लिकनहरूलाई हराउन र आफ्नो छवि बिगार्न हस्तक्षेप गरेको थियो। तर, अमेरिकी गुप्तचर निकायहरूले यसअघि नै यस्तो कुनै हस्तक्षेप नभएको निष्कर्ष सार्वजनिक गरिसकेका छन्।
ट्रम्पले हाल कडा मतदाता परिचयपत्र सम्बन्धी कानुन पारित गराउन लागिपरेका छन्, जसलाई उनका समर्थकहरूले 'सेभ अमेरिका एक्ट' नाम दिएका छन्। यो कानुनले मतदातामाथि कडा नियम लागू गर्ने र निर्वाचनमा संघीय सरकारको हस्तक्षेप बढाउने उद्देश्य राखेको छ। तल्लो सदनबाट पारित भए पनि सिनेटमा विपक्षी डेमोक्रेटिक पार्टीका सिनेटरहरूको विरोधका कारण यो विधेयक रोकिएको छ।
चीनको प्रतिक्रिया
अमेरिकीस्थित चिनियाँ दूतावासका प्रवक्ता लिउ चाङले ट्रम्पका आरोपहरूको कडा प्रतिवाद गरेका छन्। 'अमेरिकी चुनाव अमेरिकाको आन्तरिक मामिला हो र यसको नतिजा अमेरिकी जनताको भोटबाट निर्धारण हुन्छ,' चाङले भने, 'चीनले कहिल्यै पनि अमेरिकी राष्ट्रपतीय निर्वाचनमा हस्तक्षेप गरेको छैन र भविष्यमा पनि गर्ने छैन।' डेमोक्रेटिक पार्टीका सिनेटर मार्क वार्नरले ट्रम्पका भनाइहरू 'पूर्णतः झूटो' रहेको प्रतिक्रिया दिएका छन्।
गुप्तचर प्रतिवेदनको निष्कर्ष
सन् २०२१ मा जारी अमेरिकी गुप्तचर प्रतिवेदनमा २०२० को निर्वाचनमा चीनले हस्तक्षेप प्रयास गर्नेबारे विचार गरे पनि अन्त्यमा कुनै हस्तक्षेप नगरेको उल्लेख छ। यसले रुस, इरानलगायत देशले भने हस्तक्षेपको प्रयास गरेको देखाएको छ। ट्रम्पले सार्वजनिक गरेका दस्तावेज तत्कालीन गुप्तचर निर्देशक जोन र्याटक्लिफको कार्यकालमा तयार पारिएका थिए, जसले चीनले २००८ देखि नै अमेरिकी मतदाता र राजनीतिक दलहरूको जानकारी संकलन गर्ने प्रयास गरेको देखाएको थियो। तर अन्तिम प्रतिवेदनले चीनले निर्वाचन परिणाम प्रभावित पार्ने कुनै सक्रिय कदम नचालेको ठहर गरेको थियो।
अन्य देशको हस्तक्षेप
गुप्तचर प्रतिवेदनअनुसार रुसी राष्ट्रपति पुटिनको निर्देशनमा रुसी निकायले अमेरिकी चुनावलाई प्रभाव पार्ने अभियान चलाएका थिए, जसको उद्देश्य बाइडेनको अभियानलाई कमजोर बनाउने र ट्रम्पप्रति समर्थन जुटाउने थियो। इरानले ट्रम्पको चुनावी सम्भावना कमजोर पार्न प्रयास गरेको थियो। क्युबा, भेनेजुएला र लेबनानको हेजबुल्लाह समूहले पनि साना स्तरका प्रयास गरेको प्रतिवेदनमा उल्लेख छ। ब्राजिलको हकमा भने अनुसन्धानमूलक संस्था एजेन्सिया पब्लिकाको विश्लेषणले ट्रम्पको पक्षमा हजारौं ट्विट ट्रेन्डिङ भएको देखाएको थियो, जसमा ट्रम्पका सहयोगी र तत्कालीन ब्राजिलका राष्ट्रपति बोल्सोनारोका समर्थकहरूको संलग्नता थियो।
ट्रम्पले सेप्टेम्बरमा चिनियाँ राष्ट्रपति सी चिनफिङसँग भेटवार्ता गर्ने तयारी गरिरहेका छन्। व्यापार युद्धका कारण तनावपूर्ण बनेको दुई देशीय सम्बन्ध मे महिनामा ट्रम्पको बेइजिङ भ्रमणपछि केही मत्थर भएको थियो।