पश्चिम नवलपरासीका उखु किसानलाई आर्थिक वर्ष २०८२/८३ को अनुदान रकम समयमै भुक्तानी भएको छ। जिल्लाका ५ हजार ३ सय ९५ किसानको खातामा १२ करोड ६१ लाख ७७ हजार ३ सय ५ रुपैयाँ असार मसान्तअगाडि नै जम्मा गरिएको कोष तथा लेखा नियन्त्रण कार्यालय परासीका प्रमुख कमल सापकोटाले जानकारी दिए।
यद्यपि, ४ सय ६४ जना किसानले आवश्यक कागजात र विवरण पेश नगरेकाले ३५ लाख ६८ हजार ९ सय १४ रुपैयाँ भुक्तानी हुन बाँकी रहेको सापकोटाले बताए। उनका अनुसार उक्त रकम कागजात पूरा भएपछि मात्रै किसानको खातामा जानेछ।
गत आर्थिक वर्षमा बागमती चिनी उद्योगले ३ हजार ५ सय १४ जना किसानको ११ लाख ५४ हजार ४ सय ३४ क्विन्टल उखु क्रसिङ गरेको थियो भने लुम्बिनी चिनी उद्योगले १ हजार ८ सय ८१ किसानको ६ लाख ९९ हजार ८३ क्विन्टल उखु खरिद गरेको थियो। जिल्लामा रहेका चार चिनी मिलमध्ये बागमती खाँडसारी चिनी मिल र लुम्बिनी चिनी उद्योग मात्र सञ्चालनमा थिए।
प्रतापपुर गाउँपालिकाका अध्यक्ष एवं उखु उत्पादक किसान संघका केन्द्रीय प्रवक्ता उमेशचन्द्र यादवले सरकारले अनुदान रकम समयमै भुक्तानी गरेर किसानलाई राहत पुर्याएको बताए।
