फिफा अध्यक्ष जियानी इन्फान्टिनोले फिफा प्रतियोगितामा निजी लगानी भित्र्याउने विवादास्पद योजनासँग जोडिएका गल्तीप्रति माफी मागेका छन्। तर, विवाद चर्किए पनि उनले अध्यक्ष पदबाट तत्काल हट्नुपर्ने बाध्यता भने आएको छैन।
बुधबार मोरक्कोको रबातमा बसेको फिफा व्यवस्थापन बोर्डको बैठकले इन्फान्टिनोलाई नै अध्यक्षका रूपमा कायम राख्ने निर्णय गर्यो। बैठक सकिएपछि फिफाले अध्यक्षलाई आफ्नो पूर्ण समर्थन रहेको सार्वजनिक गरेको छ।
प्रस्तावमाथि आलोचना र असन्तुष्टि
इन्फान्टिनोले पुरुष तथा महिला विश्वकपसहित फिफाका प्रतियोगिताहरूमा निजी लगानी प्रवेश गराउने योजना अघि सारेका थिए। सो प्रस्तावलाई साथ दिने सदस्य संघहरूलाई ४ करोड डलर उपलब्ध गराउने योजना पनि थियो।
योजनाको युरोपेली फुटबल महासंघसहित फिफाभित्रैबाट तीव्र विरोध भएको थियो। फिफाका महासचिव माटियास ग्राफस्ट्रोमले समेत अपनाइएको प्रक्रियाप्रति असन्तुष्टि व्यक्त गरेका थिए।
माफी र आगामी प्रतिबद्धता
बैठकपछि भने इन्फान्टिनो र ग्राफस्ट्रोमले सदस्य संघहरूलाई संयुक्त पत्र लेख्दै गल्तीप्रति क्षमायाचना गरेका छन्। उनीहरूले भविष्यमा यस्ता त्रुटि नदोहोर्याउने प्रतिबद्धता समेत जनाएका छन्।
यसैबीच, सन् २०३० को विश्वकप फाइनल मोरक्कोमा आयोजना गर्न इन्फान्टिनोले मोरक्कोको समर्थन मागेको भन्ने समाचारलाई फिफाले खण्डन गरेको छ। फाइनलको आयोजना स्थलबारे निर्णय पछि मात्र गरिने फिफाको भनाइ छ।