कृषि क्षेत्रको आधुनिकीकरणमार्फत राष्ट्रिय अर्थतन्त्रमा यसको भूमिका बढाउने उद्देश्य राखेर श्रीलङ्काले शुक्रबार ६६ करोड ५० लाख अमेरिकी डलर लागतको कृषि विकास कार्यक्रम सञ्चालनमा ल्याएको छ। ‘श्रीलङ्का एग्रीकनेक्ट’ नाम राखिएको यो कार्यक्रम विश्व बैंक समूह तथा अन्तर्राष्ट्रिय कृषि विकास कोष (आईएफएडी) को आर्थिक सहयोगमा अघि बढ्नेछ।
कार्यक्रमको प्रमुख लक्ष्य सन् २०३० सम्ममा नौ लाख किसानलाई कृषि उत्पादन र बजारको मूल्य शृङ्खलासँग आबद्ध गराउनु रहेको छ। यसका लागि विश्व बैंक समूहले ५५ करोड अमेरिकी डलर र आईएफएडीले ११ करोड ५० लाख अमेरिकी डलर उपलब्ध गराउने जनाइएको छ।
सरकारी सहयोगबाहेक आगामी पाँच वर्षमा निजी क्षेत्रबाट थप १७ करोड अमेरिकी डलरसम्मको लगानी भित्र्याउने पनि कार्यक्रमको लक्ष्य छ। अधिकारीहरूका अनुसार डिजिटल प्रविधिको उपयोगसहित आधुनिकीकरणका विविध उपाय अपनाएर कृषि तथा खाद्य क्षेत्रलाई जलवायु परिवर्तनको असर सहन सक्ने र बजारमुखी उद्योगका रूपमा विकास गर्ने परिकल्पना गरिएको छ।
कार्यक्रमको शुभारम्भका क्रममा सार्वजनिक गरिएको विवरणअनुसार श्रीलङ्काको कुल गार्हस्थ उत्पादनमा कृषि तथा खाद्य क्षेत्रको योगदान करिब १५ प्रतिशत छ। त्यस्तै वस्तु निर्यातमा यस क्षेत्रको हिस्सा ३० प्रतिशत रहेको छ भने कुल रोजगारीमा यसको भाग करिब एक तिहाइ छ।
