सिन्धुपाल्चोकको डाक्लाङ, इको र लिपिङ क्षेत्रमा गएको पहिरोले थुनिएको तातोपानी नाका र राजमार्ग सञ्चालनको माग प्रतिनिधिसभामा उठेको छ। प्रतिनिधिसभा सदस्य युवराज दुलालले शुक्रबारको संसद् बैठकमा सरकारको ध्यानाकर्षण गराउँदै तातोपानी नाका र अरनिको राजमार्ग तत्काल खुलाउनुपर्ने बताए।
उनका अनुसार पहिरोले सडक अवरुद्ध गर्दा भोटेकोशी गाउँपालिकाका बासिन्दाको दैनिक जीवन प्रत्यक्ष प्रभावित भएको छ। सडक नाकाका रूपमा मात्र नभई स्थानीय जनजीवनसँग जोडिएको पूर्वाधार भएकाले महिनौँसम्म यातायात ठप्प हुँदा स्थानीयलाई निकै कष्ट भएको उनले बताए।
निरीक्षणपछि पनि पहल नहुँदा गुनासो
सांसद दुलालले केही साताअघि दुई मन्त्री, राष्ट्रिय योजना आयोगका उपाध्यक्ष, मन्त्रालयका सचिवसहित अन्य उच्च पदाधिकारीको टोलीले स्थलगत निरीक्षण गरेको स्मरण गराए। तर, निरीक्षणपछि पनि सडक सञ्चालनका लागि कुनै पहल भएको छैन। यसले अवरुद्ध सडक सुचारु गर्न सरकारको ध्यान नपुगेको उनको गुनासो छ।
व्यापारीको क्षति र सरकारसँग आग्रह
जुरे पहिरोका बेला वैकल्पिक उपाय अपनाएर छोटो समयमै सडक सञ्चालन गरिएको उदाहरण दिँदै उनले अहिले पनि तत्काल मर्मत गरी तातोपानी नाका र अरनिको राजमार्ग सञ्चालनमा ल्याउन सरकारसँग आग्रह गरेका छन्। सडक बन्द हुँदा व्यापारीहरूले ठूलो आर्थिक क्षति व्यहोर्नुपरेको उनले बताए। खासाबाट आएका सामान अन्य नाकातर्फ लैजान बाध्य हुँदा करोडौँ रुपैयाँ ढुवानी खर्च बढेको र फलफूललगायतका सामग्री नष्ट भएको उनको भनाइ छ।
