अपाङ्गता भएका व्यक्तिको अधिकारसम्बन्धी ऐन २०७४ लाई संशोधन गर्न बनेको विधेयक संघीय संसद्मा पेस गर्न मन्त्रिपरिषद्ले स्वीकृति प्रदान गरेको छ। शुक्रबार बसेको मन्त्रिपरिषद् बैठकका निर्णय सार्वजनिक गर्दै सञ्चारमन्त्री विक्रम तिमिल्सिनाले विधेयक संघीय संसद्मा पेस गर्न स्वीकृति दिइएको जानकारी दिए।
यससँगै विद्यमान ऐनमा संशोधन गर्ने प्रक्रिया संसदीय चरणतर्फ अघि बढ्ने बाटो खुलेको छ। संशोधन विधेयक संसद्मा पेस भएपछि मात्रै यसबारे विधायिकी प्रक्रिया सुरु हुनेछ।
अन्य निर्णय पनि
शुक्रबारको बैठकले आर्थिक वर्ष २०८१/८२ को व्यवस्थापन परीक्षणको वार्षिक प्रतिवेदन कार्यान्वयनका लागि भूमि व्यवस्था, सहकारी तथा गरिबी निवारण मन्त्रालय र संघीय मामिला तथा सामान्य प्रशासन मन्त्रालयमा पठाउने निर्णय समेत गरेको छ।
