नेपाली कांग्रेसका नेता गुरु बरालले पार्टीको विशेष महाधिवेशनले कांग्रेसलाई मात्र कमजोर पारेको नभई मुलुकको लोकतन्त्र र राष्ट्रियतामा समेत गम्भीर असर पुर्याएको टिप्पणी गरेका छन्।
साउन २९ गते शुक्रबार काठमाडौंमा कांग्रेस संस्थापन इतर समूहले आयोजना गरेको राष्ट्रिय भेलामा बोल्दै बरालले सो कुरा बताएका हुन्। उनले विशेष महाधिवेशनले पार्टीलाई धरासायी बनाएको र यसले देशको लोकतान्त्रिक प्रणाली र राष्ट्रियतामाथि समेत कालो बादल मडारेको दाबी गरे।
११ महिनाअघिको कालो बादल
बरालले नेपालको राजनीतिमा ११ महिनाअघि कालो बादल मडारिएको र त्यसको लपेटामा कांग्रेसका केही साथीहरू परेको स्मरण गराए। उनले पार्टीभित्रका साथीहरूलाई संयमित हुन, पार्टीमै फर्कन र आत्मालोचना गर्न आग्रह गरे।
विशेष महाधिवेशनको सन्दर्भमा सर्वोच्च अदालतले समेत रिभ्यु गरेको उनले बताए।
देउवा नेतृत्वको छातामुनि आउन आग्रह
बरालले पार्टी, राष्ट्र र लोकतन्त्रकै हितका लागि गगन थापा र विश्वप्रकाश शर्मालाई शेरबहादुर देउवा नेतृत्वको छाताभित्र आउन आग्रह गरे। अहिलेको अवस्थामा कांग्रेस र कांग्रेसभित्रको एकताले मात्र मुलुकको अवस्था सुधार नहुने उनको भनाइ छ।
देशको अवस्था सुधार्न कांग्रेसको आन्तरिक एकतासँगै देशकै समग्र एकता आवश्यक रहेको उनले बताए।
