तीन भदौ, काठमाडौं । राष्ट्रिय स्वतन्त्र पार्टीका महामन्त्री विपिनकुमार आचार्यले आउँदो स्थानीय निर्वाचनमा विदेशमा रहेका नेपालीले समेत मतदान गर्न सक्ने कानुनी व्यवस्था गर्न सरकारसँग माग गरेका छन् ।
प्रतिनिधिसभाको बैठकमा बोल्दै उनले आगामी स्थानीय चुनावलाई लक्षित गर्दै विश्वका विभिन्न मुलुकमा छरिएर रहेका नेपालीको मताधिकार सुनिश्चित गर्नुपर्नेमा जोड दिए । यसका लागि आवश्यक पर्ने काम आजैदेखि प्राथमिकताका साथ अघि बढाउन सरकारको ध्यानाकर्षण गराएका छन् ।
विदेशमा बस्ने नेपालीहरूलाई मतदानमा सहभागी गराउने विषयलाई कानुनमार्फत व्यवस्थित गर्नुपर्ने उनको भनाइ छ । यसबारे सरकारले तत्काल पहल थाल्नुपर्ने आचार्यको माग छ ।
