नेकपा (एमाले) का अध्यक्ष केपी शर्मा ओलीले वर्तमान सरकारले जनतालाई डर, त्रास र आतंकमा राख्ने काम गरिरहेको आरोप लगाएका छन्। शनिबार नगरकोटमा आयोजित पार्टीको जनसंगठन समन्वय संयन्त्र कार्यशालालाई सम्बोधन गर्दै उनले सरकारका गतिविधिलाई ‘बारुला’को संज्ञा दिए।
ओलीले सरकार बनेकै दिन आफूलाई रातभर खोजी गरेर बिहानपख गिरफ्तार गरिएको बताए। यो कार्यले अन्य सर्वसाधारणलाई त्रसित पार्ने उद्देश्य राखेको उनको टिप्पणी थियो। उनले भने, ‘मलाई मात्र समातिएन, त्यसैमार्फत अरूलाई पनि थर्कमान देखाइयो।’
आफूले यस्ता बारुलासँग मात्र होइन, यसभन्दा ठूला अरिङ्गाल र बच्छ्यूँसँग पनि सामना गरिसकेको भन्दै ओलीले डराउनु नपर्ने जिकिर गरे। उनका अनुसार डर, त्रास र आतंक देखाएर मात्र देश सधैं कसैको जिम्मामा छोड्न सकिँदैन।
उनले प्रतिगमनबाट देशलाई फर्काउनुपर्ने, प्रतिगमनकारीहरूलाई पराजित गर्नुपर्ने, अपहरित लोकतन्त्र फिर्ता ल्याउनुपर्ने र मिचिएको संविधानलाई संरक्षण गर्नुपर्ने बताए। सुशासन र विकासको बाटो समातेर देशलाई पुनः ट्र्याकमा ल्याउनु आजको आवश्यकता रहेको उनको भनाइ थियो।
त्यसै क्रममा ओलीले सम्पत्ति जफत गर्नेदेखि बैंक खाता रोक्का गर्ने र कारोबार रोक्नेसम्मका गतिविधि भइरहेको आरोप लगाए। यसले ठेकेदार, व्यवसायी र सर्वसाधारणलाई सुकुमबासीको हैसियतमा पुर्याउने र बाँच्नै नसक्ने अवस्था सिर्जना गर्ने उनको तर्क छ। नेपाली जनतामाथि यस्तो डर त्रास र आतंक सिर्जना गरी ‘तमासा’ देखाइएको उनले टिप्पणी गरे।
