काठमाडौं, ६ भदौ । नेपाल सरकार र दुर्गा प्रसाईँ नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियानबीच १४ बुँदे सहमति भएको छ। शनिबार सम्पन्न वार्तामा प्रधानमन्त्री तथा मन्त्रिपरिषद्को कार्यालय र महाअभियानबीच उक्त सहमति जुटेको हो।
सहमतिपत्रमा सरकारतर्फबाट प्रधानमन्त्री कार्यालयका सहसचिव लिलाधर सुवेदी र प्रसाईँ समूहतर्फबाट विष्णु बोहरा क्षेत्रीले हस्ताक्षर गरेका छन्।
सहमति भएसँगै महाअभियानले आयोजना गर्दै आएका धर्ना तथा आन्दोलनका सम्पूर्ण कार्यक्रम शनिबारबाटै अन्त्य गर्ने निर्णय भएको छ। ललितपुरको पुल्चोकमा धर्नामा बसेका महाअभियानका प्रतिनिधि र सरकारले गठन गरेको वार्ता टोलीबीच गहन छलफलपछि सम्झौतापत्रमा हस्ताक्षर भएको दुवै पक्षले जनाएका छन्।
