कर्णाली प्रदेश सरकारमा सहभागी नेपाली कांग्रेसका मन्त्रीहरूले सामूहिक रूपमा राजीनामा बुझाएका छन्। एमाले नेता यामलाल कँडेलले नेतृत्व गरेको प्रदेश सरकारमा रहेका कांग्रेसका चारै जना मन्त्रीहरूले सोमबार राजीनामा दिएका हुन्।
सोमबार बिहान आयोजित मन्त्रिपरिषद् बैठकमा कांग्रेसका तर्फबाट सरकारमा सहभागी मन्त्रीहरूले सामूहिक राजीनामा पेश गरेको सामाजिक विकास मन्त्री घनश्याम भण्डारीले जानकारी दिए। मन्त्री भण्डारीका अनुसार बुझाइएको राजीनामा स्वीकृतिको पर्खाइमा रहेको छ। त्यस्तै, उद्योग, पर्यटन, वन तथा वातावरण मन्त्री सुरेश अधिकारीले पनि आज बिहानको क्याबिनेट बैठकमा आफूहरूले सामूहिक रूपमा राजीनामा बुझाएको पुष्टि गरे।
राजीनामा दिने मन्त्रीहरू र मन्त्री शाहको बैंकक प्रस्थान
कँडेल नेतृत्वको कर्णाली प्रदेश सरकारमा नेपाली कांग्रेसका तर्फबाट चार जना मन्त्रीहरू सहभागी थिए। राजीनामा दिनेहरूमा आर्थिक मामिला मन्त्री राजीवविक्रम शाह, जलस्रोत मन्त्री विजया बुढा, सामाजिक विकास मन्त्री घनश्याम भण्डारी र उद्योग, पर्यटन, वन तथा वातावरण मन्त्री सुरेश अधिकारी रहेका छन्।
यीमध्ये आर्थिक मामिला मन्त्री राजीवविक्रम शाह हाल स्वास्थ्य उपचारको सिलसिलामा थाइल्यान्डको बैंककमा रहेका छन्। उनले आफू उपचारका लागि बैंकक प्रस्थान गर्नुभन्दा अगाडि नै संसदीय दलको नेतासमक्ष राजीनामा पत्र बुझाएर गएको बताए। अस्पतालमै उपचाररत मन्त्री शाहले आफू चार-पाँच दिनअघि बैंकक आएको र आज सहकर्मी मन्त्रीहरूले सामूहिक रूपमा राजीनामा बुझाएको जानकारी पाएको उल्लेख गरे।