भोटेकोशी बाढीमा परी बेपत्ता भएका इन्जिनियर अजयको अत्तोपत्तो करिब दुई महिना बित्न लाग्दा पनि नलागेको छ । उनको खोजी तथा पहिचानका लागि सरकारले ठोस पहल नगरेको भन्दै परिवारले असन्तुष्टि जनाएको छ ।
अजयका बुबा हरिनारायणका अनुसार अहिलेसम्म उनको कुनै संकेत भेटिएको छैन, शव पनि फेला परेको छैन । घरपरिवारसँग बुबाको खोजी गर्ने नातिलाई दिने कुनै जवाफ नभएको उनको भनाइ छ । बेपत्ता भएका व्यक्तिकै कमाइमा घर चलेका परिवार धेरै रहेको र ती परिवारको अवस्था थप कष्टकर बनेको उनले बताए ।
बाढीपछि परिवारजन अजयको खोजीमा नुवाकोटको बट्टारस्थित नं. १ सैन्य तालिम केन्द्रसम्म पुगेका थिए । आमसञ्चार प्राधिकरण मधेश प्रदेशका पूर्वअध्यक्षसमेत रहेका दाजु श्यामसुन्दर र भाइ जयप्रकाशलगायत परिवारका सदस्य रसुवा पुगेर पनि खोजी गरेका थिए । तर चौतर्फी प्रयासका बाबजुद उनको पत्तो लाग्न सकेन ।
पहिचानका लागि हरिनारायण गत भदौ १९ गते गजेन्द्रनारायण सिंह अस्पताल राजविराज पुगेर डीएनए परीक्षणका लागि रगतको नमुना दिइसकेका छन् ।
बाढीले सर्वस्व गुमाएका परिवार पालमुनि रात काट्न बाध्य रहेको उल्लेख गर्दै उनले तीन तहको सरकार हुँदाहुँदै पीडित परिवारसम्म कुनै निकाय नपुगेको बताए । बेपत्ताको खोजी र पहिचान गर्ने दायित्व सरकारकै भएको भन्दै उनले जनप्रतिनिधिको जवाफदेहिता प्रस्ट हुनुपर्ने माग गरेका छन् ।
