काठमाडौँ — नेपाल प्रिमियर लिग (एनपीएल) सिजन ३ को अवसर पारेर एक्सट्रिम इनर्जी ड्रिंकले 'एक्सट्रिम एन्थम' सार्वजनिक गरेको छ । मैदानभित्रको प्रतिस्पर्धा र मैदानबाहिरको समर्थकीय उत्साहलाई संगीतको लयमा बाँध्ने उद्देश्यसहित तयार गरिएको यो गीत कम्पनीको आधिकारिक युट्युब तथा टिकटक खातामार्फत हेर्न र सुन्न सकिने कम्पनीले जनाएको छ ।
एन्थममा युनिक पोयटका नामले परिचित उत्साह जोशीको स्वर तथा शब्द रहेको छ भने ब्लुस (सुरज शाही) ले संगीत सिर्जना तथा संयोजन गरेका छन् । गीतको निर्माण 'एनएफटीपी' टिमले गरेको कम्पनीको भनाइ छ ।
चौका–छक्कासँगै बढ्ने उत्सुकता, दर्शकदीर्घाबाट गुञ्जिने हुटिङ र आफ्नो टोलीको जितमा झल्किने गर्वलाई संगीतमार्फत अभिव्यक्त गरिएको कम्पनीको दाबी छ । विशेषगरी युवा पुस्ताको सांगीतिक रुचि र क्रिकेटतर्फ बढ्दो आकर्षणलाई ध्यानमा राखेर एन्थम तयार गरिएको बताइएको छ ।
प्रायोजन साझेदारी
एनपीएल सिजन ३ मा एक्सट्रिम इनर्जी ड्रिंक काठमाडौं गोर्खाज, लुम्बिनी लायन्स, विराटनगर किङ्स, जनकपुर बोल्ट्स, चितवन राइनोज र कर्णाली याक्ससँग मुख्य प्रायोजकका रूपमा जोडिएको छ । पोखरा एभेन्जर्ससँग भने जर्सीको छातीमा लोगो रहने गरी प्रायोजन साझेदारी गरिएको कम्पनीले जनाएको छ ।
खेलाडीको जित्ने अठोट, टोलीप्रति समर्थकको विश्वास र दर्शकदीर्घाको उत्साहलाई संगीतमार्फत जोडेर क्रिकेटप्रेमीको भावनासँग नजिकिने प्रयास गरिएको कम्पनीको भनाइ छ । खेलाडीले मैदानमा गर्ने प्रदर्शनको जोस र दर्शकले महसुस गर्ने रोमाञ्चलाई स्वरमा उतार्दै क्रिकेटको माहोललाई थप जीवन्त बनाउने अपेक्षा कम्पनीले राखेको छ ।
क्रिकेटको सौन्दर्य केवल मैदानभित्रको प्रतिस्पर्धामा सीमित नभई खेलाडी र समर्थकबीचको साझा भावनामा पनि रहन्छ भन्ने धारणा कम्पनीले अघि सारेको छ । सोही सम्बन्ध र क्रिकेटप्रतिको साझा प्रेमलाई संगीतमा उतारिएको एन्थमले नेपाली क्रिकेटको उत्साहलाई नयाँ लय दिने विश्वास गरिएको कम्पनीको भनाइ छ ।
