४८ राष्ट्र सहभागी विश्वकप फुटबलको फाइनलमा सोमबार बिहान ००:४५ बजे (नेपाली समय) अर्जेन्टिनाले स्पेनको सामना गर्दैछ। न्यु जर्सीको मेटलाइफ रंगशालामा हुने यो खेल लियोनेल मेसीको विश्वकप करियरको अन्तिम खेल हुन सक्ने अनुमान गरिएको छ।
अर्जेन्टिना सन् १९६२ मा ब्राजिलले गरेजस्तै लगातार दोस्रो पटक विश्वकप जित्ने लक्ष्यमा छ। अर्जेन्टिनाले यसअघि २०२२ मा उपाधि जितेको थियो। स्पेन भने २०१० पछि पहिलो पटक विश्वकपको उपाधि जित्न चाहन्छ।
हलिउड स्टारदेखि राष्ट्रपतिसम्मको उपस्थिति
फाइनल खेलको मध्यान्तरमा हलिउड स्टार टम क्रुज, गायिका मेडोना र साकिराले प्रस्तुति दिनेछन्। मध्यान्तरको समय १५ मिनेटबाट बढाएर ३० मिनेट पुर्याइएको छ। यो विश्वकपको मध्यान्तरमा पहिलो पटक यस्तो प्रदर्शनी हुन लागेको हो।
८० हजार दर्शकमाझ हुने खेलमा अमेरिकी राष्ट्रपति डोनाल्ड ट्रम्प पनि उपस्थित हुनेछन्। यो आयोजक राष्ट्रका रुपमा अमेरिकाले मेक्सिको र क्यानडासँग मिलेर आयोजना गरेको विश्वकपको उनले हेर्न लागेको पहिलो खेल हुनेछ। मेक्सिकी राष्ट्रपति क्लाडिया शेइनबाउम र क्यानडाका प्रधानमन्त्री मार्क कार्नी पनि समारोहमा सहभागी हुनेछन्।
मेसीको अन्तिम विश्वकप खेलको सम्भावना
मेसी अर्जेन्टिनाका कप्तानका रुपमा दोस्रो पटक उपाधि दिलाउने दाउमा छन्। यदि सफल भए अर्जेन्टिनाको विश्वकपमा चौथो सफलता हुनेछ। अर्जेन्टिनाका प्रशिक्षक लियोनेल स्कालोनीले ३९ वर्षीय मेसीलाई लिएर भने, 'मेसीले इतिहास रचेका छन् र उनी महान् हुन्।'
अर्जेन्टिना यस विश्वकपमा कहिल्यै हार नमान्ने मनोवृत्ति देखाइरहेको छ। अन्तिम १६ मा इजिप्टविरुद्ध २–० ले पछि परेर पनि खेल उल्टाएको थियो भने सेमिफाइनलमा इंग्ल्यान्डविरुद्ध सानदार पुनरागमन गरेको थियो।
स्पेनको सामूहिक प्रदर्शन
स्पेन भने प्रतियोगितामा एकै लयमा खेलिरहेको छ। टोलीले ७ खेलमा मात्र १ गोल खाएको छ। सेमिफाइनलमा फ्रान्सलाई एकतर्फी बनाएको थियो। स्पेनका कप्तान रोड्रीले शारीरिक लडाइँका लागि तयार रहेको र उत्तेजनालाई बेवास्ता गर्ने बताए। उनले भने, 'यो खेल शारीरिक रुपमै हुनेछ र हामी त्यसका लागि तयार हुनुपर्नेछ, तर हामी परिस्थितिअनुसार फरक खेल खेल्न पनि जान्दछौं।'
१९ वर्षे लामिन यमाल स्पेनका यस्ता युवा प्रतिभा हुन् जसलाई भविष्यका विश्व उत्कृष्ट खेलाडीको रुपमा हेरिएको छ। तर स्पेनले व्यक्तिगतभन्दा सामूहिक प्रदर्शनमा जोड दिइरहेको छ।