काठमाडौँ — नेपाल प्रिमियर लिग (एनपीएल) तेस्रो सिजनको उद्घाटन खेलमा सुदूरपश्चिम रोयल्स पराजित भएपछि टिमका प्रशिक्षक मिसबह उल–हकले आफ्नो टिमको प्रदर्शनलाई फितलो रहेको स्विकारेका छन् । पाकिस्तानी क्रिकेटका लिजेन्डसमेत रहेका उल–हकले अबका खेलमा टिमको प्रदर्शन अनुशासित हुनुपर्ने बताएका छन् ।
सोमबार भएको उद्घाटन खेलमा सुदूरपश्चिमलाई डिफेन्डिङ च्याम्पियन लुम्बिनी लायन्सले सहजै सात विकेटले हराएको थियो । दुई पटक उप–विजेता बनेको सुदूरपश्चिम गत सिजनको फाइनलमा पनि लुम्बिनीसँगै पराजित भएको थियो ।
खेलपछिको पत्रकार सम्मेलनमा उल–हकले प्रतियोगिताको पहिलो खेलमा यस्तो प्रदर्शन कहिलेकाहीँ हुन सक्ने भन्दै पनि आफ्नो टिमको खेल वास्तवमै फिक्का रहेको बताए । यसलाई खराब सुरुआत मान्नुपर्ने उनको भनाइ छ । आफ्ना ब्याटरले राम्रो सट खेल्न नसकेको उल्लेख गर्दै उनले अबका खेलमा राम्रो प्रदर्शन आवश्यक रहेको औंल्याए ।
पिच केही सुस्त रहेकाले यस्तो अवस्थामा साझेदारी महत्त्वपूर्ण हुने, तर आफ्ना खेलाडीले त्यसअनुसारको प्रदर्शन गर्न नसकेको पनि उनले बताए । पहिले ब्याटिङ गरेको सुदूरपश्चिम नियमित अन्तरालमा विकेट गुमाउँदै ८७ रनमै अलआउट भएको थियो ।
यता विजयी लुम्बिनीका खेलाडी किशोर महतोले भने यो जितलाई स्वप्निल सुरुआतका रूपमा लिएका छन् । पिचको व्यवहार केही सुस्त रहे पनि आफूहरूले राम्रो गर्न सकेको र आफूले चिताएकै जस्तो खेल भएको उनको भनाइ छ । यो राम्रो सुरुआत भएको उनले बताए ।
