काठमाडौं — बीमा ऐन, २०७९ र धितोपत्र सम्बन्धी ऐन, २०६३ अन्तर्गतको कसुरमा फरार एक प्रतिवादीलाई प्रहरीले पक्राउ गरेको छ। पक्राउ पर्नेमा काठमाडौं महानगरपालिका–७ का मृगेन्द्रनाथ रिमाल रहेका छन्।
केन्द्रीय अनुसन्धान ब्युरो (सीआईबी) को टोलीले रिमाललाई काठमाडौं महानगरपालिका–७ सिफलबाट नियन्त्रणमा लिएको हो। उनलाई काठमाडौं जिल्ला अदालतमा उपस्थित गराइएको ब्युरोले जनाएको छ।
सीआईबीका प्रवक्ता एसएसपी अनुपम शमशेर जबराका अनुसार रिमाल दीपक भट्टसँग जोडिएको मुद्दामा फरार प्रतिवादीका रूपमा रहेका थिए। गत जेठ २८ गते जिल्ला अदालत काठमाडौंमा मुद्दा दायर गर्दा उनी फरार थिए। फरार नै कायम गरी मुद्दा दायर गरिएको थियो।
रिमाललाई बीमा ऐन, २०७९ र धितोपत्र सम्बन्धी ऐन, २०६३ अन्तर्गतको कसुरमा पक्राउ गरिएको हो। यी ऐनहरूअन्तर्गत उनीमाथि अनुसन्धान भइरहेको ब्युरोले जनाएको छ।