केन्द्रमा नेकपा एमाले र नेपाली कम्युनिस्ट पार्टी (नेकपा) बीच भएको सत्ता साझेदारी सहमतिअनुसार बागमती प्रदेश सरकारको नेतृत्व एमालेले गर्ने भएको छ। शनिबार एमाले अध्यक्ष केपी शर्मा ओली र नेकपा संयोजक पुष्पकमल दाहाल ‘प्रचण्ड’बीच भएको लिखित सम्झौताअनुसार कोशी, बागमती र लुम्बिनी प्रदेशको सरकार एमालेले चलाउनेछ भने कर्णाली र सुदूरपश्चिम प्रदेशको नेतृत्व नेकपाले गर्नेछ।
यो सहमतिसँगै बागमतीमा नयाँ सरकार गठनको प्रक्रिया अघि बढेको छ। तर, मुख्यमन्त्री को बन्ने भन्ने विषयमा एमालेभित्र औपचारिक निर्णय भएको छैन। पार्टी संसदीय दलका नेता जगन्नाथ थपलिया र निवर्तमान स्वास्थ्य मन्त्री किरण थापा मुख्यमन्त्रीका प्रमुख दाबेदारका रूपमा देखिएका छन्। दुवै नेताले आफ्नो पक्षमा निर्णय गराउन आन्तरिक लबिङ तीव्र पारेको बताइन्छ।
थपलिया चितवनका हुन् र प्रदेशको पूर्व आर्थिक मामिला मन्त्रीसमेत भइसकेका छन्। उनले सार्वजनिक रूपमा आफूलाई मुख्यमन्त्रीको दाबेदारका रूपमा उभ्याउँदै आएका छन्। अर्का दाबेदार थापा भक्तपुरका हुन् र प्रदेशमा दुई पटक स्वास्थ्य मन्त्री भएका थिए। उनी पार्टी अध्यक्ष ओलीसँग निकट मानिन्छन्। थापाले पछिल्लो सरकारबाट राजीनामा दिएका थिए।
बागमती प्रदेशसभामा हाल १०४ सदस्य छन्। सरकार गठनका लागि बहुमत अर्थात् ५३ सांसदको समर्थन आवश्यक छ। प्रदेशसभाको सबैभन्दा ठूलो दल कांग्रेस ३६ सिटसहित छ भने नेकपासँग २६, एमालेसँग २५ (उपसभामुखसहित), राप्रपासँग १२, नेपाल मजदुर किसान पार्टीसँग ३ र हाम्रो नेपाली पार्टीसँग २ सिट छ। एमाले र नेकपा मिल्दा ५१ सांसद हुन्छन्, जुन बहुमतभन्दा दुई सिट कम हो। त्यसैले एमाले नेतृत्वको सरकारलाई राप्रपा वा अन्य साना दलको समर्थन चाहिनेछ।
राप्रपा बागमती प्रदेश संसदीय दलका नेता उद्धव थापाले सरकार गठन प्रक्रियामा जटिल परिस्थिति उत्पन्न भए आफ्नो पार्टीले साथ दिने बताएका छन्। एमाले र नेकपाले पनि राप्रपासँग संवाद गरिरहेको नेताहरूले जनाएका छन्। संसदीय दलको नेता मुख्यमन्त्री हुने व्यवस्थाअनुसार थपलिया स्वाभाविक दाबेदार हुन् भने थापालाई मुख्यमन्त्री बनाउन पहिले संसदीय दलको नेता चयन गर्नुपर्नेछ।
एमालेका एक सांसदका अनुसार दुवै नेता हाल काठमाडौंमा छन् र पार्टी नेतृत्वको निर्णय प्रतीक्षामा छन्। कांग्रेस नेतृत्वको सरकार अल्पमतमा परेपछि बागमतीमा नयाँ सरकार गठनको बाटो खुलेको हो।
