एकदिवसीय अन्तर्राष्ट्रिय क्रिकेटले पाँच हजार खेल पूरा गर्दा खेलको प्रकृति नै धेरै हदसम्म बदलिएको छ। सुरुका एक हजार खेलमा प्रति खेल औसत रनरेट ४.३५ रहेकोमा अहिले त्यो बढेर ५.२९ पुगेको छ। पछिल्ला एक हजार खेलको अवधिमा तीन सय रनभन्दा माथिको लक्ष्य सफलतापूर्वक भेट्टाउने कीर्तिमानी क्रम ९० पटक दोहोरिएको छ।
एसोसिएट टोलीको सहभागिताको असर
एसोसिएट राष्ट्रहरू पनि निरन्तर रूपमा एकदिवसीय अन्तर्राष्ट्रिय खेल्न आएपछि रन वृद्धिको गतिमा भने केही कमी आएको छ। त्यस्ता खेलहरूमा प्रतिस्पर्धात्मक तह उच्च भए पनि स्कोर भने कम बन्ने गरेको तथ्यांकले संकेत गर्छ।
बाउन्ड्री प्रहारको दर दोब्बर
ब्याटिङ औसत पनि उल्लेख्य रूपमा माथि गएको छ, तर सबैभन्दा धेरै वृद्धि चौका र छक्का प्रहारमा देखिएको छ। दुई दशकअघिको तुलनामा बाउन्ड्री प्रहारको मात्रा अहिले दोब्बर बनिसकेको छ।
सुरुका एक हजार खेलमा हरेक १२७.०१ बलमा एक छक्का निस्किन्थ्यो भने प्रत्येक खेलमा औसत ४.३० छक्का प्रहार हुन्थ्यो। पछिल्ला एक हजार खेलको तथ्यांक हेर्दा भने प्रत्येक खेलमा ९.२९ छक्का पुगेको छ र ५५.४२ बलको अन्तरालमा एक छक्का प्रहार हुने अवस्था बनेको छ।
