अविरल वर्षाका कारण देशभरको सडक सञ्जाल प्रभावित भएको छ। पहिरो, सडक धसिनु र नदी कटानका कारण नौ सडक खण्ड पूर्ण रूपमा अवरुद्ध भएका छन् भने जोखिम बढेपछि दुई प्रमुख मार्गमा रात्रिकालीन यात्रा प्रतिबन्ध लगाइएको छ।
नेपाल प्रहरीका अनुसार बीपी राजमार्गको खुर्कोट–नेपालथोक–कटुन्जेबेसी–सिन्धुली खण्डमा बाढीको सम्भावित जोखिम रहेकाले बेलुका ६ बजेदेखि बिहान ४ बजेसम्म सवारी सञ्चालन रोकिएको छ। बिहान ४ बजेदेखि बेलुका ६ बजेसम्म मात्र सवारी साधन चलाउन दिइने व्यवस्था गरिएको छ। यस्तै, मकवानपुरको कान्ति लोकपथमा पनि वर्षाका कारण बेलुका ५ बजेदेखि बिहान ५ बजेसम्म सबै सवारी साधनको आवागमन बन्द गरिएको छ।
प्रमुख राजमार्गका अवरुद्ध खण्ड
मेची राजमार्ग इलाम नगरपालिका–९ स्थित राजदुवालीमा सडक हिलो भएपछि अवरुद्ध भएको छ। तर, उक्त खण्डमा वैकल्पिक मार्ग उपलब्ध रहेको बताइएको छ। अरनिको राजमार्ग सिन्धुपाल्चोकको भोटेकोशी गाउँपालिका–२ इकु भन्ने स्थानमा पहिरोले ढुङ्गा, माटो र हिलो खसालेपछि अवरुद्ध भएको छ। सोही राजमार्ग लिपिङ क्षेत्रमा सडक धसिएर पनि अवरुद्ध छ।
रसुवाको उत्तरगया गाउँपालिका–५ खल्तेमा त्रिशूली नदीले सडकको फेदी कटान गरेपछि पासाङ ल्हामु राजमार्ग अवरुद्ध भएको हो। त्रिशूली–मैलुङ–स्याफ्रुबेसी मार्गमा सवारी आवागमन ठप्प छ। यस्तै, जाजरकोट र डोल्पा जोड्ने वेरी करिडोर रुकुम पश्चिमको आठबिस्कोट नगरपालिका–६ रिजेगार्ड खोलामा ढुङ्गा, माटो र हिलो खस्दा अवरुद्ध भएको छ।
पहाडी तथा हिमाली जिल्लामा जोखिम
सङ्खुवासभाको भोटखोला गाउँपालिका–३ स्थित सिरेकडाँडामा कोशी राजमार्ग करिब १० मिटर धसिएको छ। यसले खाँदबारी–किमाथाङ्का मार्ग अवरुद्ध बनाएको छ। लमजुङको मर्स्याङ्दी गाउँपालिका–४ रामबजारमा माथिबाट खसेको पहिरोले बेसीशहर–मनाङ सडक अवरुद्ध भएको छ। म्याग्दीको अन्नपूर्ण गाउँपालिका–३ रुक्सेमा पनि ढुङ्गा, माटो र हिलोसहितको पहिरो खस्दा बेनी–जोमसोम सडक बन्द छ।
पहाडी तथा हिमाली जिल्लाका जोखिमपूर्ण सडकमा यात्रा गर्नुअघि सडकको अवस्थाबारे जानकारी लिन र सुरक्षा निर्देशन पालना गर्न प्रहरीले आग्रह गरेको छ। अविरल वर्षाका कारण पहिरो, सडक धसिने र नदी कटानको जोखिम बढेको प्रहरीले जनाएको छ।
