चितवन — नीलम कार्की निहारिकाको उपन्यास ‘राजमाता’ले २०८२ सालको ‘कविडाँडा आख्यान पुरस्कार’ प्राप्त गरेको छ। कविडाँडा साहित्य समाजले दिने उक्त पुरस्कार शुक्रबार वितरण गरिएको छ।
समाजका अध्यक्ष एलबी क्षेत्रीका अनुसार पुरस्कार राशि २ लाख १६० रुपैयाँ छ। कथा तथा उपन्यासजस्ता आख्यान कृतिलाई प्रदान गरिने यो राशि नेपालमै सबैभन्दा बढी भएको उनको दाबी छ।
समाजले वर्षभरि प्रकाशित आख्यानमध्ये उत्कृष्ट कृतिलाई छानेर पुरस्कृत गर्दै आएको छ। स्थापनाका हिसाबले २०६० सालमा भरतपुरमा गठन भएको समाजले २०७५ सालदेखि हरेक वर्ष आख्यान पुरस्कार दिँदै आएको अध्यक्ष क्षेत्रीले जानकारी दिए।
छनोट प्रक्रिया
पुरस्कारका लागि यसपटक २५ देखि ३० वटासम्म आख्यान कृति प्राप्त भएका थिए। तीमध्ये १६ कृतिको पहिलो सूची सार्वजनिक गरिएको, त्यसपछि आठ र अन्त्यमा उत्कृष्ट तीन कृतिको नाम तय भएको क्षेत्रीले बताए। सोही तीनमध्येबाट २०८२ सालमा प्रकाशित उत्कृष्ट आख्यानका रूपमा ‘राजमाता’ घोषित गरिएको उनको भनाइ छ।
समाजले गठन गरेको निर्णायक समितिले अन्य साहित्य पारखीको परामर्शमा यो निर्णय गरेको पनि उनले उल्लेख गरे। ‘राजमाता’लाई पुरस्कृत गर्ने घोषणा गत असोज ७ गते भएको थियो।
उपन्यासको विषय
राज्य सञ्चालनमा नारी तथा राजमाताहरूले निर्वाह गरेको भूमिकालाई ऐतिहासिक तथ्यमा आधारित रही कलात्मक ढंगले उपन्यासमा प्रस्तुत गरिएको अध्यक्ष क्षेत्रीको भनाइ छ। मातृसत्ताको सन्दर्भमा उपन्यासमा साहसिक कल्पना गरिएको पनि उनले बताए।
देश समृद्ध हुन साहित्य पनि समृद्ध हुनुपर्ने भन्दै स्तरीय लेखनलाई प्रोत्साहित गर्न समाजले पुरस्कार स्थापना गरेको क्षेत्रीले जनाए।
