७ भदौ, बारा । बारामा हत्या गरिएकी तीन वर्षीया बालिका गरिमा चौधरीको आइतबार अन्त्येष्टि गरिएको छ ।
गत मंगलबारदेखि बारा सदरमुकामस्थित कलैया प्रादेशिक अस्पतालको शवगृहमा राखिएको गरिमाको शव शनिबार मध्यरात सरकारसँग भएको सहमतिपछि परिवारले बुझेको थियो । बुधबारदेखि बालिकाको हत्याविरुद्ध भइरहेको सडक संघर्ष सोही सहमतिपछि स्थगित भएको हो ।
कलैया उपमहानगरपालिका–१४ बघवनस्थित पसाहा खोलामा गरिमाको हिन्दु परम्पराअनुसार अन्तिम संस्कार गरिएको हो । उनका बुबा मनोज चौधरीले दागबत्ति दिएका थिए ।
सरकारसँग सहमति जुटाउन शनिबार साँझ काठमाडौं गएका गरिमाका बुबा मनोज र आमा मानमती चौधरी आइतबार मध्यान्ह फर्किएपछि कलैया अस्पतालबाट शव लगिएको थियो ।
अन्तिम संस्कारमा बाराका प्रमुख जिल्ला अधिकारी धर्मेन्द्रकुमार मिश्र, प्रहरी उपरीक्षक नरेन्द्र कुँवर लगायतका सुरक्षा अधिकारीहरू सहभागी थिए ।
