भोटेकोशी नदीमा आएको बाढीले क्षतिग्रस्त बनाएका विद्युत् संरचनाको मर्मत तथा पुनःस्थापना गर्दै प्रभावित क्षेत्रमा विद्युत् आपूर्ति सुचारु गर्न नेपाल विद्युत् प्राधिकरणले कामलाई तीव्रता दिएको छ।
बाढीका कारण विद्युत् संरचनामा उल्लेख्य क्षति पुगेपछि प्राधिकरणले प्रभावित क्षेत्रको सेवा नियमित गर्न आवश्यक प्राविधिक जनशक्ति र स्रोतसाधन परिचालन गरेको हो। विद्युत् आपूर्तिलाई सहज बनाउन वैकल्पिक व्यवस्था समेत अपनाइएको प्राधिकरणले जनाएको छ।
प्राधिकरणका अनुसार बाढीबाट संरचनामा क्षति पुगे पनि प्रभावित क्षेत्रमा विद्युत् सेवा यथाशीघ्र नियमित गर्ने उद्देश्यले मर्मत तथा पुनःस्थापनाको कामलाई उच्च प्राथमिकतामा राखेर अघि बढाइएको छ। सबै उपलब्ध स्रोतसाधन परिचालन गरी विद्युत् आपूर्ति नियमित गर्न प्रयास जारी रहेको प्राधिकरणको भनाइ छ।
यसैबीच, ऊर्जा, जलस्रोत तथा सिंचाई मन्त्रालयले पनि प्रभावित क्षेत्रमा सौर्य ऊर्जा प्रविधिमार्फत तत्काल विद्युत् सेवा पुर्याउन संयन्त्र परिचालन गरेको छ।
