काठमाडौं, १० भदौ । रसुवा बाढीका कारण ज्यान गुमाउनेको सङ्ख्या ७२ पुगेको छ । सशस्त्र प्रहरी बल नेपालले उपलब्ध गराएको विवरणअनुसार बाढी प्रभावित जिल्लाहरूबाट हालसम्म ७२ जनाको शव सङ्कलन गरिएको हो ।
सशस्त्र प्रहरीको तथ्याङ्कले सबैभन्दा बढी क्षति चितवनमा देखाएको छ । चितवनमा मात्रै २८ शव फेला परेका छन् । तीमध्ये पाँच महिला, १३ पुरुष र लैङ्गिक पहिचान खुल्न नसकेका १० जना छन् ।
यस्तै, धादिङमा १८ शव भेटिएका छन्, जसमा ११ महिला, पाँच पुरुष र दुई लैङ्गिक पहिचान नखुलेका व्यक्ति छन् । नुवाकोटबाट भने ११ शव फेला परेका छन्, जसमा पाँच महिला र छ पुरुष रहेका छन् ।
गोरखामा दुई महिला, चार पुरुष र पहिचान खुल्न नसकेका तीन जनासहित नौ शव भेटिएका छन् । त्यसैगरी तनहुँमा दुई पुरुष, एक बालिका र एक बालक गरी चार जनाको शव फेला परेको छ । पूर्वी नवलपुरमा एक बालिका र रसुवामा एक पुरुषको शव भेटिएको सशस्त्र प्रहरी बल नेपालले जनाएको छ ।
