काठमाडौँ। नेपाली कांग्रेसको १५औं महाधिवेशनअन्तर्गत उपसभापति र महामन्त्री पदका उम्मेदवारको मत गणना शनिबार बेलुकादेखि सुरु भएको छ। पार्टीको केन्द्रीय कार्यालय सानेपामा गणना भइरहेको निर्वाचन समितिले जनाएको छ।
समितिका संयोजक तथा वरिष्ठ अधिवक्ता प्रेमबहादुर खड्काका अनुसार खुला उपसभापति र महामन्त्री पदका उम्मेदवारको मत गणना बेलुका साढे ७ बजेदेखि थालिएको हो। गणना सुरु गर्नुअघि समितिले सम्बन्धित उम्मेदवारहरूसँग छलफल गरेको थियो र उनीहरूकै उपस्थितिमा मतपेटिका खोलिएको थियो।
समितिका सदस्य सचिव राजु कटुवालका भनाइमा सानेपास्थित पार्टी कार्यालयका १४ वटा कोठामा गणना जारी छ। गणनास्थलमा सीसी क्यामेरा जडान गरिएको र मत गणनामा खटिने प्रतिनिधिहरूको नाम संकलन गरेपछि मात्रै गणना सुरु गरिएको उनले बताए।
सभापतिमा थापाको जित
यसअघि शुक्रबार राति मतदान सम्पन्न भएलगत्तै सभापति पदको मत गणना भएको थियो। सभापतिको निर्वाचनमा गगनकुमार थापा विजयी भएका छन्। उनले श्यामकृष्ण खड्गीलाई पराजित गरेका हुन्। थापाले करिब ९४ प्रतिशत मत प्राप्त गरेको समितिले जनाएको छ।
थापाले शनिबार पार्टी कार्यालयमा आयोजित कार्यक्रममा सम्बोधन गर्दै खड्गीसहित बाँकी पदको गणनामा पराजित हुने सबैलाई साथमा लिएर अघि बढ्ने प्रतिबद्धता जनाएका छन्।
