पोखरा अन्तर्राष्ट्रिय विमानस्थल र पोखरा विमानस्थल (पुरानो विमानस्थल) को हवाई आवागमन हुने तथा त्यसको आसपासको क्षेत्रमा चङ्गा, ड्रोन र बेलुन उडाउन तथा लेजर लाइट प्रयोग गर्न निषेध गरिएको छ । यस्ता गतिविधिले विमानको उडान सुरक्षामा गम्भीर असर पार्ने भएकाले सबैमा सार्वजनिक रूपमा सूचना जारी गरिएको पोखरा अन्तर्राष्ट्रिय विमानस्थलका प्रमुख जगन्नाथ निरौलाले जानकारी दिए ।
विमानस्थल आसपासको क्षेत्रमा जथाभावी फोहोरमैला फाल्ने तथा नहरमा मृत पशुपन्छी बगाउनेजस्ता गतिविधि पनि उडान सुरक्षाका लागि जोखिमपूर्ण मानिएका छन् । यस्ता कामले चराचुरुङ्गी तथा वन्यजन्तुको गतिविधि बढाई विमानको उडान र अवतरणमा असर पार्न सक्ने भएकाले फोहोरमैला तथा मृत पशुपन्छीको उचित व्यवस्थापन गर्न आग्रह गरिएको छ ।
कडा कारबाहीको चेतावनी
जारी गरिएको सूचनाको अवज्ञा गर्दै उल्लेखित गतिविधि गरेको पाइएमा प्रचलित कानुनबमोजिम कडा कारबाही हुने पोखरा अन्तर्राष्ट्रिय विमानस्थल नागरिक उड्डयन कार्यालयले जनाएको छ ।
