रसुवाको भोटेकोशी नदीमा बुधबार आएको विनाशकारी बाढीका कारण मृत्यु हुनेको संख्या १७७ पुगेको छ। नेपाल प्रहरीका अनुसार मृतकमा ६९ पुरुष, ४१ महिला, १० बालिका र सात बालक छन्। मृतकमध्ये ५० जनाको पहिचान भने खुलेको छैन।
बाढीको प्रभाव रसुवामा मात्र सीमित रहेन। शवहरू रसुवासँगै नुवाकोट, धादिङ, गोरखा, चितवन, तनहुँ र पूर्वी नवलपरासीमा समेत फेला परेका छन्, जसले बाढीको असर व्यापक रहेको देखाएको छ।
उद्धार तथा खोजी कार्यलाई तीव्रता दिइएको छ। नेपाली सेनाका प्रवक्ता राजाराम बस्नेतले रसुवाको टिमुरे, धुन्चे र माइलुङबाट ४५ विदेशीसहित ३३६ जनालाई हवाई उद्धार गरिएको जानकारी दिए। उनका अनुसार ती विदेशी छ देशका छन्। साथै, नेपाली सेनाका करिब चार हजार जनशक्ति खोज तथा उद्धार, आपत्कालीन उपचार र राहत वितरणमा खटिएका छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार हालसम्म ३७ उद्धार उडान भएका छन् भने हेलिकप्टरमार्फत ३०५ जनालाई उद्धार गरिएको छ।
सरकारद्वारा १२ आपत्कालीन टोली गठन
बाढीपछिको उद्धार, राहत र पुनर्स्थापना कार्यलाई व्यवस्थित रूपमा अघि बढाउन सरकारले १२ वटा छुट्टाछुट्टै टोली गठन गरेको छ। ती टोलीहरूले सञ्चार र विद्युत् पुनर्स्थापना, खोज तथा उद्धार, आपत्कालीन स्वास्थ्य सेवा, शव व्यवस्थापन र पहिचान, बेपत्ता व्यक्ति तथा परिवारको सहयोग, राहत सामग्री, विमानस्थल तथा हेलिकप्टर सञ्चालन, सडक सम्पर्क, क्षति तथा आवश्यकता आकलन र अन्तर्राष्ट्रिय सहयोग समन्वयको जिम्मेवारी पाएका छन्।
यसैगरी, उद्धार गरिएका, बेपत्ता भएका वा मृत्यु भएकाहरूको नाम सार्वजनिक गर्ने समन्वयका लागि छुट्टै टोली बनाइएको छ। सञ्चार टोलीले सञ्चार सेवा अवरुद्ध भएका क्षेत्रहरूको पहिचान गरी सेवा पुनर्स्थापनाको काम गर्नेछ भने विद्युत् पुनर्स्थापना टोलीले डिजेल र पोर्टेबल जेनेरेटरसहित आपत्कालीन आपूर्तिको व्यवस्था मिलाउनेछ। सडक तथा यातायात टोलीले बेली ब्रिज निर्माण, सवारी आवागमन सुचारु गर्ने र प्रभावित क्षेत्रमा ट्राफिक व्यवस्थापनको समन्वय गर्ने जिम्मेवारी पाएको छ।
तीन जिल्लाका लागि २ करोड ५० लाख रुपैयाँ
सरकारले बाढी प्रभावित तीन जिल्लाका लागि तत्काल २ करोड ५० लाख रुपैयाँ उपलब्ध गराएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका उपसचिव रामबहादुर केसीका अनुसार रसुवा र नुवाकोटलाई एक–एक करोड रुपैयाँ र धादिङलाई ५० लाख रुपैयाँ उपलब्ध गराइएको छ।
त्यस्तै, बाढीपीडितका लागि राहत सामग्री संकलन गर्न तीन स्थान तोकिएको छ। त्रिभुवन अन्तर्राष्ट्रिय विमानस्थलस्थित राष्ट्रिय आपत्कालीन गोदाममा वैदेशिक उडानबाट आउने राहत सामग्री संकलन गरिनेछ। त्यस्तै, नुवाकोटको बट्टारस्थित नेपाली सेनाको मैथिली ब्यारेक र धादिङको बैरेनीस्थित सेनाको ब्यारेकमा राहत सामग्री संकलन गर्ने व्यवस्था गरिएको छ।
संकलित राहत सामग्री प्रभावित समुदायको आवश्यकताअनुसार वितरण गरिने प्राधिकरणले जनाएको छ। सहयोग उपलब्ध गराउनेहरूलाई राहत सामग्री तोकिएका संकलन स्थल वा सम्बन्धित प्रमुख जिल्ला अधिकारीमार्फत मात्र पठाउनसमेत आग्रह गरिएको छ।
