ज्योतिषी हरिहर अधिकारीले निर्माण गरेको नेपाली चलचित्र ‘पार्वती’ ले बक्स अफिसमा २ करोड २९ लाख रुपैयाँ कारोबार गरेको विवरण सार्वजनिक भएको छ। गत आइतबारसम्मको यो रिपोर्टमा उल्लेखित आँकडा चलचित्र विकास बोर्डको बक्स अफिस रिपोर्टमा भने भेटिँदैन, जसले चलचित्रको वास्तविक व्यापारबारे प्रश्न उठाएको छ।
यसअघि हरिहर नेपाली चलचित्र जगत्मा ज्योतिषीय गणना गर्ने व्यक्तिका रूपमा परिचित थिए। राजेश हमाल अविवाहित रहेको समयमा उनको विवाहको साइत कहिले जुर्छ भनी गणना गरिदिने काम हरिहरले गरेका थिए, र यसैबाट उनी चर्चामा आएका थिए।
अरूका चलचित्रको नाम के राख्ने र कहिलेबाट मुहूर्त गर्ने भन्ने विषयमा पनि उनको ज्योतिषीय गणनाले काम गर्थ्यो। नामकरणदेखि प्रदर्शनको तिथि तोक्नेसम्मका काम भए पनि चलचित्र नचल्ने अवस्था देखिएपछि यसबारे चलचित्रकर्मीहरूमा प्रश्न उठ्न थालेको थियो।
त्यसपछि उनी आफैँ चलचित्र बनाउनेतर्फ लागे। पहिलो चलचित्र ‘शुभलाभ’ मा उनले हिरोको भूमिकामा समेत अभिनय गरे, तर नामअनुसार यो चलचित्रले उनलाई लाभ दिलाउन सकेन। पहिलो प्रयासमा सफलता नपाए पनि उनको जोश भने कायम रह्यो।
श्रीमतीलाई हिरोइन बनाएर उनले दोस्रो चलचित्र ‘ह्रस्व दीर्घ’ निर्माण गरे। दक्षिण भारतीय अभिनेता ब्रह्मानन्दमलाई समेत अभिनय गराइएको यो चलचित्र नेपाली, हिन्दी र तेलुगु भाषामा तयार गरिएको थियो। यो चलचित्रबाट पनि उनलाई अपेक्षित लाभ भएन।
तेस्रो चलचित्र ‘पार्वती’ का सन्दर्भमा भने हरिहर आफ्नो धारणा फरक राख्छन्। एक अन्तर्वार्तामा उनले भनेका छन् :
‘फिल्मले आफ्नो लगानी सुरक्षित गरिसक्यो, स्लोली स्लोली चल्दै छ।’
चलचित्र प्रदर्शन भएको ६ साता बितिसकेको छ। यसैबीच बक्स अफिसमा २ करोड २९ लाख रुपैयाँको कारोबार देखिए पनि चलचित्र विकास बोर्डको पछिल्लो बक्स अफिस रिपोर्टमा ‘पार्वती’ को नाम समावेश नहुनुले चलचित्रको व्यापारबारे थप बहस सिर्जना गरेको छ।
