बाढी प्रभावित क्षेत्रमा निःशुल्क भ्वाइस, डेटा र एसएमएस सेवा उपलब्ध गराउँदै आएको एनसेलले उक्त सेवालाई थप सात दिनका लागि विस्तार गरेको छ। रसुवाको भोटेकोशी नदीमा आएको बाढीबाट प्रभावित क्षेत्रमा शनिबारदेखि निःशुल्क सेवा थप एक साता उपलब्ध हुने कम्पनीले जनाएको छ। यसले सञ्चार, खोज तथा उद्धार र राहत प्रयासलाई सहयोग पुग्ने बताइएको छ।
यसअघि विनाशकारी बाढीपछि तीन दिनका लागि निःशुल्क डेटा, सबै नेटवर्कमा भ्वाइस कल र एक सय वटा निःशुल्क एसएमएस उपलब्ध गराइने घोषणा एनसेलले गरेको थियो। सो अवधि शुक्रबार समाप्त हुँदैछ।
एनसेलका प्रमुख उपभोक्ता व्यवसाय अधिकृत उपाङ्ग दत्तले सेवा विस्तारले बाढी प्रभावित समुदायलाई आफ्ना परिवारसँग जोडिन मद्दत पुर्याउने र उद्धार तथा राहत टोलीबीचको समन्वय सहज बनाउने बताए।
कम्पनीले बाढीले अवरुद्ध पारेका १८ वटा मोबाइल टावर पुनः सञ्चालनमा ल्याइसकेको र बाँकी नौ वटा प्रभावित टावर सञ्चालनमा ल्याउने कार्य भइरहेको जनाएको छ।
यसैबीच, एनसेल फाउन्डेसनले बिहीबार प्रधानमन्त्री दैवी प्रकोप उद्धार कोषमा खोज, उद्धार, राहत तथा पुनःस्थापनाका लागि रु एक करोड सहयोग गरेको छ।
त्यस्तै, कम्पनीले प्रभावित क्षेत्रका नागरिकलाई अधिकारीहरूको निर्देशनअनुसार चल्न आग्रह गर्दै एसएमएस र सामाजिक सञ्जालमार्फत सुरक्षासम्बन्धी सूचना प्रवाह गरिरहेको छ।
