प्रहरीले देशका दुई छुट्टाछुट्टै जिल्लाबाट प्रतिबन्धित लागुऔषधसहित चार जनालाई नियन्त्रणमा लिएको छ। कैलाली र धनुषाका विभिन्न स्थानमा गरिएको कारबाहीका क्रममा खैरो हेरोइन र गाँजासहित उनीहरू पक्राउ परेका हुन्।
कैलालीमा खैरो हेरोइनसहित दुई जना पक्राउ
कैलालीको टीकापुर नगरपालिका–७ स्थित जटाशंकर घाट क्षेत्रबाट प्रहरीले दुई जनालाई खैरो हेरोइनसहित नियन्त्रणमा लिएको छ। पक्राउ पर्नेहरूमा बर्दगोरिया गाउँपालिका–१ का २४ वर्षीय चिरञ्जीवी बादी र बर्दगोरिया–२ का २५ वर्षीय दिनेश सुनार रहेका छन्।
टीकापुर प्रहरीका अनुसार शंकास्पद रूपमा फेला परेका उनीहरूको तलासी लिँदा ४ ग्राम ४९० मिलिग्राम खैरो हेरोइन बरामद भएको हो। बरामद लागुऔषधसहित दुवै जनालाई हिरासतमा राखेर थप अनुसन्धान अघि बढाइएको प्रहरीले जनाएको छ।
धनुषामा गाँजासहित दुई जना नियन्त्रणमा
यसैगरी धनुषा जिल्लाका दुई फरक स्थानबाट प्रहरीले गाँजासहित दुई जनालाई पक्राउ गरेको छ। धनुषाको नगराइन नगरपालिका–२ स्थित नगराइन बजारबाट १५० ग्राम गाँजासहित ५५ वर्षीय हेमन मण्डल पक्राउ परेका छन्।
त्यस्तै, जनकपुर बसपार्क क्षेत्रबाट गएराति ११ बजे २१ वर्षीय सुभाष कुमार मण्डललाई प्रहरीले नियन्त्रणमा लिएको छ। उनको साथबाट ५० ग्राम गाँजा बरामद भएको प्रहरीले जानकारी दिएको छ। पक्राउ परेका दुवै जनामाथि प्रहरीले कानुनी प्रक्रिया अगाडि बढाएको छ।