काठमाडौं, अक्टोबर १२ । उद्योग विभागले च्युइङगममा प्रयोग हुने 'पर्फेक्ट सेन्टर फिल्ज' ट्रेडमार्कको दर्ता खारेज गरेको छ। इटालियन कन्फेक्सनरी कम्पनी पर्फेट्टी भान मेले एस.पी.ए.को स्थापित 'सेन्टर फ्रुट' ट्रेडमार्कसँग उक्त चिन्ह पर्याप्त रूपमा समान रहेको सर्वोच्च अदालतको फैसला आएपछि विभागले दर्ता खारेज गरेको हो।
सर्वोच्च अदालतले मुद्दा नम्बर ०७७-सीआई-०३०१ मा दुई चिन्हबीचको समानताले सामान्य उपभोक्तामा भ्रम उत्पन्न गर्न सक्ने निष्कर्ष निकालेको थियो। सोही आधारमा विभागले दुहबी, सुनसरीमा रहेको पर्फेक्ट फुड्स प्रालिको नाममा दर्ता भएको ट्रेडमार्क खारेज गरेको हो। कम्पनीले क्लास ३० अन्तर्गत च्युइङगमका लागि आवेदन नम्बर ०६१८२२ मार्फत सो चिन्ह दर्ता गराएको थियो।
समानता आँक्ने आधार
ट्रेडमार्कबीचको समानता जाँच्दा शब्दगत तुलनालाई मात्र आधार बनाउनु नहुने सर्वोच्च अदालतको विश्लेषणमा उल्लेख छ। उच्चारण, चिन्हको देखिने स्वरूप, उत्पादनको प्रकृति, बिक्री हुने स्थल, खरिदका बेला उपभोक्ताले दिने ध्यान तथा बजारमा पर्ने समग्र प्रभावजस्ता पक्षलाई समेत विचार गर्नुपर्ने अदालतको ठहर छ।
कानुनी व्यवस्था
पेटेन्ट, डिजाइन तथा ट्रेडमार्क ऐन, २०२२ ले निश्चित अवस्थामा दर्ता भइसकेको ट्रेडमार्क खारेज गर्न उद्योग विभागलाई अधिकार दिएको छ। ऐनमा खारेज भएका ट्रेडमार्क व्यावसायिक कारोबारमा प्रयोग भइरहे जरिवाना लगाउने तथा सम्बन्धित मालसामान जफत गर्न सक्ने व्यवस्था समेत रहेको छ।
यो निर्णयलाई स्थापित ट्रेडमार्क तथा बौद्धिक सम्पत्ति अधिकारको संरक्षणलाई बलियो बनाउने दिशामा महत्त्वपूर्ण कदमका रूपमा हेरिएको छ।
