मतदाता नामावली अद्यावधिक कार्यक्रमअन्तर्गत जिल्ला निर्वाचन कार्यालयले ३ हजार ३६२ जनाको नाम मतदाता सूचीबाट हटाएको छ। दोहोरो दर्ता भएका, मृत्यु भइसकेका तथा नागरिकता परित्याग गरेका मतदाताको नाम सूचीबाट हटाइएको कार्यालयले जनाएको छ।
हटाइएकामध्ये सबैभन्दा ठूलो संख्या दोहोरो दर्ता भएकाहरूको छ। निर्वाचन आयोगको प्रणालीमार्फत जाँच गर्दा दोहोरो दर्ता कायम रहेको देखिएपछि १ हजार ९४३ जनाको नाम हटाइएको हो।
मृत्यु दर्ता र नागरिकता परित्यागको आधार
कार्यालय प्रमुख भीमसेन कार्कीका अनुसार भदौ १२ गतेसम्म मृत्यु दर्ता भएका १ हजार ३८० मतदाताको नाम पनि नामावलीबाट हटाइएको छ। सम्बन्धित वडा कार्यालय तथा मृतकका परिवारले कार्यालयमा दर्ता गरेको मृत्यु प्रमाणपत्रका आधारमा उनीहरूको नाम हटाइएको उनले बताए।
यसैगरी नागरिकता परित्याग गरेका ३९ जनाको नाम जिल्ला प्रशासन कार्यालयबाट प्राप्त विवरणका आधारमा सूचीबाट हटाइएको कार्कीले जानकारी दिए।
जिल्लामा गत फागुनमा सम्पन्न प्रतिनिधिसभा निर्वाचनका बेला ४ लाख ४२ हजार ८२ मतदाता रहेका थिए। फागुन २१ गतेको मतदानपछि भने १३ हजार १३४ मतदाता थपिएका छन्।